Kuvendi votoi zgjatjen e Vetingut, reagon Delegacioni i OSBE: Pikë me rëndësi kyçe, do t’u ofrojmë mbështetje për bashkëpunimin afatgjatë!

Delegacioni i OSBE në Tiranë ka përshëndetur vendimin e Kuvendit për të zgjatur organet e Vetingut deri në vitin 2024.

OSBE shkruan se përfundimi i reformës në drejtësi është me rëndësi kyçe, teksa shton se prezenca e OSBE-së do të vijojë t’u ofrojë mbështetje të plotë institucioneve shqiptare, si dhe për zbatimin e rekomandimeve të OSBE/ODIHR-it.

“Prezenca e OSBE-së në Shqipëri mirëpret vendimin ndërpartiak të Kuvendit për të zgjatur mandatin e institucioneve të vetingut. Kjo votë njeh faktin që Kushtetuta u përket të gjithë qytetarëve shqiptarë, dhe ne përgëzojmë konvergjencën mes opozitës dhe maxhorancës. Përfundimi i reformës në drejtësi është i një rëndësie kyçe. Është po aq e rëndësishme që të gjitha forcat politike të vijojnë në rrugën e reformës me këtë frymë respekti të ndërsjellë për të mirën e interesit kombëtar. Prezenca e OSBE-së do të vijojë t’u ofrojë mbështetje të plotë institucioneve shqiptare, në bazë të mandatit të saj dhe të bashkëpunimit tonë afatgjatë. Po ashtu, përshëndesim ngritjen e komisioneve të posaçme për reformën zgjedhore dhe atë territoriale. Prezenca mbetet e gatshme të vijojë të ndihmojë institucionet e Shqipërisë për zbatimin e rekomandimeve të OSBE/ODIHR-it”, thuhet në njoftimin OSCE Presence in Albania.