Lugano, qendra e tretë financiare e Zvicrës, po kryen një eksperiment unik social dhe ekonomik që e ka shndërruar qytetin në “kryeqytetin” evropian të kriptomonedhave. Në kafenetë e sheshit kryesor, pagesa për një kafe nuk kufizohet vetëm te franga zvicerane; konsumatorët mund të përdorin lirisht Bitcoin, USDT (një stablecoin i lidhur me dollarin) dhe LVGA, monedhën dixhitale lokale të qytetit.
Ky sistem pagese lindi gjatë pandemisë si një strategji e bashkisë për të ndihmuar bizneset lokale. Fillimisht u krijua LVGA (shqiptuar LUGA), një token dixhital që funksionon përmes një aplikacioni dhe ofron një sistem cashback prej 5-10 për qind për blerjet.
Ky mekanizëm siguron që paratë të qarkullojnë brenda qytetit, pasi LVGA-të nuk mund të konvertohen mbrapsht në franga, por vetëm të shpenzohen në mbi 400 biznese pjesëmarrëse, përfshirë dyqane, hotele dhe madje edhe në McDonald’s.
Suksesi i LVGA-së hapi rrugën për “Planin ₿”, një bashkëpunim midis bashkisë dhe kompanisë Tether. Ky plan synon integrimin e plotë të Bitcoin dhe USDT në jetën e përditshme. Për të mbrojtur tregtarët nga luhatjet e famshme të çmimeve të kriptomonedhave, sistemi mundëson konvertimin e menjëhershëm të pagesës në franga zvicerane.
Sot, Lugano pranon kriptomonedha edhe për pagesën e taksave dhe gjobave, duke thyer barrierat e financave tradicionale. Përveç lehtësimit të pagesave, qyteti është bërë një magnet për inovacionin. Përmes hapësirave si “POë Space”, Lugano po tërheq qindra startup-e dhe studiues nga mbarë bota, duke e rigjallëruar ekonominë pas viteve të stanjacionit.
Megjithatë, projekti nuk po kalon pa debate. Opozita ka ngritur shqetësime mbi etikën, koston mjedisore të prodhimit të kriptove dhe rrezikun e pastrimit të parave. /tesheshi.com/
