Heshtja ka pllakosur në fshatin Greçalli të Fierit, atje ku një 38 vjeçar ka rrëmbyer, vrarë e më pas groposur në oborrin e shtëpisë së tij, një fëmijë 8 vjeçar.
Policia e arrestoi autorin, i cili pas marrjes në pyetje e pranoi krimin makabër. 38 vjeçari quhet Klodian Çalamani dhe sipas fqinjëve prej kohësh kishte marrë rrugën e keqe. Ende nuk dihet motivi që ka shtyre 38 vjeçarin t’i marrë jetën një fëmije të mitur, të cilin dyshohet se e ka vrarë duke e qëlluar me një lopatë.
Fqinjët ndërkohë janë pyetur nga media.
“Tani e mora vesh…”-thotë një banor i fshatit.
“Ky maskarai që ka bërë këtë, është rritur pa nënë e baba, ky ka marrë rrugën e keqe”-tregoi një prej tjetër burrë.
Një tjetër banor shprehu keqardhjen për 8 vjeçarin e ndjerë.
“Na ka ardhur keq si për fëmijën tonë. Ishte djalë flori i urtë.”
Një tjetër fqinj që banonte jo shumë larg banesës së autorit, tregoi se Klodiani jetonte në kushte të vështira.
“Mua nuk më ka bezdisur. Për të folur fliste si njeri taman. Unë shtëpinë pak më andej e kam. Komunikonte me njerëzit mirë. Nuk më ka thirrur ndonjëherë në banesë. Me njerëzit ishte taman, por pinte alkool, pinte.
Për të punuar, punonte ku të gjente. Prindërit i janë ndarë. Kishte një shtëpi si kasolle. Në kushte të këqija. Nuk ishte si shtëpi taman. Ishte si godinë e vogël. Ai lëvizte në lagje me biçikletë.”
Ndërkohë një tjetër i ri, foli për median duke thënë se ai ishte ‘pijanec’, një “njeri shumë i keq”.
Ndërkohë rezulton se Çalamani ka qenë me precedentë të mëparshëm penalë. Në vitin 2006, ai së bashku me mikun e tij kanë rrëmbyer një vajzë adoleshente, në atë kohë vetëm 16 vjeçe. Këtë të fundit e pëlqente miku i Çalamanit, i cili ndihmoi shokun për të rrëmbyer të miturën.