Skandali “Dosjet Epstein”, që përfshin pedofilin e dënuar Jeffrey Epstein, ka mbërritur papritur në Sllovaki.
E-mailet e reja që janë publikuar zbulojnë lidhje midis abuzuesit të dënuar seksual Jeffrey Epstein dhe ish-ministrit të Jashtëm sllovak Miroslav Lajçak, ish-Përfaqësues i Lartë për Bosnjën dhe ish-ndërmjetësues i dialogut mes Prishtinës e Beogradit, tani këshilltar i lartë i kryeministrit Robert Fico.
“Dosjet Epstein” përmbajnë mijëra dokumente që detajojnë rrjetin kriminal të Jeffrey Epstein dhe lidhjet e tij me elitat globale politike, të biznesit dhe akademike.
Jeffrey Epstein, një i dënuar për kryerje të veprave penale seksuale që kreu vetëvrasje në burg, është akuzuar për trafikim vajzash të mitura. Të mërkurën, demokratët në Komitetin Mbikëqyrës të Dhomës së Përfaqësuesve të SHBA-së publikuan e-mail-e të reja, disa prej të cilave përmendin edhe Presidentin e SHBA-së Donald Trump.
Sipas korrespondencës, Epstein përmendi Miroslav Lajçak në disa mesazhe, duke e përshkruar atë si një person me “ndikim ndërkombëtar”.
Në një e-mail nga viti 2019, Epstein e prezantoi atë me një kontakt të paidentifikuar si ministrin aktual të Jashtëm sllovak, kryetarin e OSBE-së, ish-presidentin e Kombeve të Bashkuara dhe, më e rëndësishmja, një “mik”, sipas Euroactiv.
Ai gjithashtu e quajti Lajçak me nofkën e tij të famshme sllovake “Miro”, duke sugjeruar një afërsi personale. Në një shkëmbim tjetër nga viti 2018, të botuar për herë të parë nga media sllovake 360-tka.sk, Epstein shkroi se “Miro po vjen në Palm Beach” – duke aluduar në një nga rezidencat e Epstein në Florida – “për të hartuar një strategji”.
Faqja e internetit sllovake e lajmeve Aktuality.sk vuri në dukje të premten, më 14 nëntor, se dokumentet nuk përmbanin prova që Lajçak ishte në dijeni ose i përfshirë në aktivitetet kriminale të Epstein. Megjithatë, ato tregojnë se Epstein e konsideronte atë një aleat në qarqet diplomatike ndërkombëtare.
Komentet e kryeministrit Robert Fico dhe reagimi nga vetë Lajçak
E-mail-et tregojnë gjithashtu interesin e dukshëm të Epstein-it në politikën sllovake. Ai komentoi dorëheqjen e kryeministrit të atëhershëm Robert Fico në vitin 2018 pas vrasjes së gazetarit investigativ Jan Kuçiak, dhe më vonë kritikoi zgjedhjen e presidentes pro-evropiane Zuzana Kaputova në vitin 2019 – duke shkruar se Lajçak “do të kishte qenë një kandidat më i mirë”.
Ish-Ministri i Jashtëm sllovak dhe këshilltari aktual i kryeministrit Robert Fico, Miroslav Lajçak, pranoi në një deklaratë për TASR të premten, më 14 nëntor, se në të kaluarën kishte ndërvepruar shoqërisht me Jeffrey Epstein vetëm brenda fushëveprimit të detyrave të tij diplomatike.
Sipas Lajçak, roli i një diplomati është të krijojë kontakte me një rreth sa më të gjerë partnerësh, dhe ai ka takuar mijëra njerëz të tillë gjatë gjithë karrierës së tij. Gjatë qëndrimit të tij në Nju Jork, tha ai, dhjetëra njerëz me ndikim e takuan, përfshirë Epstein-in, me të cilin shumë figura publike nga SHBA-ja dhe jashtë vendit mbanin kontakte në atë kohë.
“Komunikimi ynë i mëvonshëm, të cilin ai e inicioi, ishte i një natyre shoqërore dhe i kushtohej kryesisht komentimit të ngjarjeve aktuale në botë,” tha Lajçak, duke shtuar se ai ende mban komunikim të ngjashëm sot me dhjetëra njerëz që takoi gjatë karrierës së tij profesionale.
“Ndërgjegjja ime është e pastër, nuk kishte asgjë që devijonte nga korniza standarde në këtë,” theksoi Lajçak, sipas gazetës sllovake Pravda. /tesheshi.com/
