Policia greke filloi lëvizjen e migrantëve në ishullin Lesbos në çadrat e kampit të ri të enjten, më shumë se shtatë ditë pasi një zjarr shkatërroi kampin më të madh të migrantëve, Mori, ku ata kanë qenë deri më tani.
Qëllimi i operacionit është të mbrojë shëndetin publik, tha policia.
“Operacioni filloi me shumë oficerë policie me kostume të bardha, situata është e qetë dhe migrantët ngadalë po lëvizin në kampin e ri,” tha një dëshmitar i Reuters.
Zjarri që përfshiu kampin Moria shtatë ditë më parë la më shumë se 12,000 njerëz, kryesisht refugjatë nga Afganistani, Siria dhe vende të ndryshme afrikane, pa strehë, kanalizime dhe akses në ushqim dhe ujë.
Autoritetet thanë se zjarri u shkaktua nga migrantë.
Largimi nga ishulli
Kampi i ri i përkohshëm i çadrave në Kara Tepa, pranë portit ishullor të Mytilene, është gati të strehojë të paktën 5,000 njerëz.
Zyrtarët thanë se disa migrantë hezitonin të lëviznin në kampin e ri sepse shpresonin të largoheshin nga ishulli.
Të mërkurën në mëngjes, vetëm 1200 njerëz u zhvendosën, por në mbrëmje, grupe të mëdha njerëzish filluan të mbërrinin në kamp duke transportuar gjëra.
Ministrat thanë se autoritetet do të vazhdonin “për disa ditë më shumë me mirëbesim dhe komunikim” për të bindur migrantët të hynin në kampin e ri, duke thënë se kalimi i tyre do të përfundonte për disa ditë.
