Kryeprokurori ushtarak libian, Mesud Erhume Miftah kërkoi nga Komisioni i Lartë i Zgjedhjeve që të ndalojë proceset e kandidimit të liderit të forcave jolegjitime në lindje të vendit, Khalifa Haftar dhe djalit të liderit të rrëzuar Muammar Gaddafi, Seyfulislam Gaddafi, për zgjedhjet e 24 dhjetorit.
Sipas lajmeve në mediat libiane, Prokurori i Përgjithshëm Miftah i dërgoi një letër zyrtare kryetarit të Komisionit të Lartë të Zgjedhjeve, Imad es-Sayih.
Në shkrim janë përfshirë vrasje të ndryshme dhe krime lufte që i atribuohen Haftarit dhe Seyfulislam Gaddafit.
Kryeprokurori ushtarak Miftah kërkoi që të ndërpriten të gjitha proceset e kandidimit të Haftarit dhe Seyfulislam Gaddafit për zgjedhjet presidenciale të planifikuara për 24 dhjetor deri në përfundimin e hetimeve ndaj tyre.
Diskutimet për zgjedhjet dhe kandidaturat
Seyfulislam Gaddafi, djali i liderit të rrëzuar të Libisë, Muammar Gaddafi, aplikoi për kandidaturë për zgjedhjet presidenciale të 14 nëntorit.
Seyfulislam Gaddafi, i kërkuar nga Gjykata Penale Ndërkombëtare për kryerjen e krimeve kundër njerëzimit dhe Zyra e Kryeprokurorit Ushtarak të Libisë lëshoi një urdhër arresti për të me akuzat për “vrasje” dhe “përdorim mercenarësh”, u shfaq për herë të parë personalisht në qendrën zgjedhore në Sebha, në jug të vendit që kur u rrëzua babai i tij në vitin 2011.
Khalifa Haftar, udhëheqësi i forcave të armatosura të paligjshme në lindje të Libisë, njoftoi se ai është një kandidat për zgjedhjet presidenciale të 16 nëntorit.
Haftar, i cili u akuzua për krime lufte dhe shkelje të ndryshme të të drejtave të njeriut gjatë sulmeve që ndërmori në kryeqytetin Tripoli në vitin 2019, shpalli kandidaturën e tij për presidencën me një video-mesazh të transmetuar në një televizion lokal pro-Haftarit.
Pas aplikimeve, Zyra e Kryeprokurorit Ushtarak të Libisë kërkoi nga Komisioni i Lartë i Zgjedhjeve që të ndalojë proceset e kandidaturës në lidhje me zgjedhjet presidenciale deri në përfundimin e hetimit për krimet që i atribuohen Khalifa Haftarit dhe Seyfulislam Gaddafit.
Komisioni i Lartë i Zgjedhjeve Libian njoftoi se aplikimet për kandidaturë të paraqitura për zgjedhjet presidenciale dhe parlamentare “nuk nënkuptojnë pranimin përfundimtar të kandidatëve”.