Mikhail Gorbachev, udhëheqësi i fundit sovjetik, paralajmëroi një tjetër mur të ri, fizik ose të padukshëm, midis Rusisë dhe Perëndimit, 30 vjet pas rënies së Murit të Berlinit.
Në një koment të Reuters-it për në prag të 30 -vjetorit të rënies së Murit të Berlinit, i cili ndodhi në 9 nëntor 1989, ai akuzoi gjithashtu Uashingtonin, një ish-armik me Moskën në Luftën e Ftohtë, për shkatërrimin e sistemit të kontrollit të armëve bërthamore, që pretendohej se garantonte paqen në botë.
Meritori për bashkimin e Gjermanisë
Reuters kujton se Gorbachev, tashmë 88-vjeçar, luajti një rol kryesor në ngjarjet që çuan në rënien e Murit të Berlinit dhe përfundimin e Luftës së Ftohtë, pasi ai ishte sekretar i përgjithshëm i Partisë Komuniste Sovjetike dhe më vonë president i Bashkimit Sovjetik.
Ai njoftoi tërheqjen e trupave sovjetike nga vendet e Evropës Qendrore dhe Lindore të mbizotëruar nga Moska me dekada, dhe e bëri të qartë se nuk do të ndërhynte në punët e brendshme të Republikës Demokratike të atëhershme gjermane (RDGJ).
Ai gjithashtu vendosi të mbajë trupat sovjetike të stacionuar në RDGJ në kazermat e tyre dhe më vonë ra dakord për ribashkimin e Gjermanisë.
Natën e 9 nëntorit 1989, policia kufitare në Gjermaninë Lindore hapi pikat e kalimit në Murin e Berlinit, të ngritur në vitin 1961, dhe banorët e Berlinit Lindor filluan të kalojnë “kufirin” masivisht.
Të shqetësuar për marrëdhëniet Uashington-Moskë
Tre dekada më vonë, Gorbatchev tha se ishte i shqetësuar për gjendjen e vështirë të marrëdhënieve Lindje-Perëndim, dhe veçanërisht mungesën e dialogut midis Uashingtonit dhe Moskës për armët bërthamore.
Ai iu referua vendimit të Uashingtonit për t’u tërhequr nga marrëveshja e rëndësishme e armëve bërthamore e vitit 1987, e cila u negociua me Presidentin e atëhershëm të SHBA, Ronald Reagan.
Vendimi i presidentit amerikan Donald Trump për t’u tërhequr nga ajo marrëveshje në gusht “nuk është një punë me mendje të madhe”, tha Gorbachev.
Ndaj, Gorbachev paralajmëroi krijimin e barrierave reale ose të padukshme të ngjashme me Luftën e Ftohtë, të ngjashme me Murin e Berlinit.
“Vendosja e çdo lloj muri është një përpjekje për t’u shmangur nga një problem i vërtetë, i cili në asnjë mënyrë nuk mund të çojë në zgjidhjen e këtij problemi, dhe kjo është arsyeja pse unë jam kundër mureve. Dhe në Evropë unë jam kundër çdo linje ndarëse ose ‘perdeje hekuri’”, tha ish-presidentii fundit sovjetik, duke e ruajtur gjithashtu një dozë optimizmi. “Nuk mendoj se do të ketë një përsëritje të Luftës së Ftohtë. Nuk ka luftë ideologjike midis Rusisë dhe Perëndimit, e nga ana tjetër ka lidhje ekonomike, liri të lëvizjes, komunikim dhe konvergjencë kulturore. Kështu që unë jam i bindur që mund të shmanget një Luftë e re e Ftohtë”, shkroi Gorbachev për Reuters.
Vlerësohet në Perëndim, përbuzet në Rusi
Duke preferuar të kalojë një pjesë të vitit në Gjermani, aty ku udhëton herëpashere, ai tha se ende jeton në Rusi, të cilën nuk e ka lënë kurrë, dhe shton se ende interesohet për mendimet e rusëve, megjithëse karakteri dhe vepra e tij vlerësohen shumë më tepër në Perëndim sesa në atdheun e tij. Në Rusi, disa ende e përçmojnë atë për udhëheqjen e Bashkimit Sovjetik gjatë shpërbërjes, e ndjekur nga një krizë e rëndë ekonomike.
Edhe pse disa ende dëgjojnë këshillat e tij në Kremlin për shkak të përvojës së tij të gjerë në diplomaci dhe marrëdhënieve me Uashingtonin, si dhe për rolin e tij në përfundimin e Luftës së Ftohtë, ai rrallë paraqitet në publik.
Ai shtoi se ai ishte një nga kontribuesit në faktin se ribashkimi i Gjermanisë kishte ndodhur pa gjakderdhje.
“Në atë kohë, 380,000 ushtarë (sovjetikë) tanë ishin në territorin e RDGJ. Ata u urdhëruan të mbeten në kazermat e tyre. Procesi jashtëzakonisht i ndërlikuar vazhdoi pa gjakderdhje. Mendoj se kam merita për këtë”, theksoi Gorbatchev.
