Parlamenti Evropian mbështeti një program të ri “BE për Shëndetin” për të përgatitur më mirë Unionin për veprim të përbashkët në rast të krizave shëndetësore ndërkufitare siç është pandemia COVID-19.

Pandemia COVID-19 ka treguar se BE urgjentisht ka nevojë për një program ambicioz që do të mundësojë që sistemet shëndetësore evropiane të përgatiten për kërcënimet shëndetësore në të ardhmen, tha PE, dhe programi EU4Health duhet të përgatisë më mirë Unionin për kujdesin shëndetësor kryesor ndërkufitar, si dhe të rrisë  qëndrueshmërinë e sistemeve shëndetësore.

Programi i ri do të mundësojë një përgjigje më efektive ndaj epidemive të ardhshme, por edhe ndaj problemeve afatgjata të tilla si plakja e popullsisë dhe pabarazitë shëndetësore.

Duke iu drejtuar eurodeputetëve, Komisionerja e Shëndetësisë Stella Kyriakides theksoi rëndësinë e mbështetjes së një programi të tillë pasi BE përballet me krizën shëndetësore të shkaktuar nga përhapja e COVID-19.

“Janë kohë të vështira për qytetarët tanë, për aktivitetet ekonomike të vendeve anëtare, për sistemet shëndetësore të Bashkimit Evropian. Rritja e infektimeve është jashtëzakonisht shqetësuese, Kemi tetë milion raste të konfirmuara vetëm në BE. Numri i shtrimeve në spital dhe problemet shëndetësore në lidhje me pandeminë po rritet”. ajo tha.

Parlamenti Evropian ka kërkuar që buxheti afatgjatë i BE të trefishohet në 5.1 miliardë euro nga 1.7 miliardë të propozuara nga vendet anëtare.

Deputetët gjithashtu mbështesin krijimin e një mekanizmi evropian të reagimit shëndetësor, krijimin e një portali komunikimi për publikun për shkëmbimin e informacionit të verifikuar, dërgimin e paralajmërimeve për qytetarët evropianë, si dhe luftimin e dezinformatave.

Raportuesi për programin e BE për Shëndetin, eurodeputeti rumun Cristian-Silviu Busoi, vuri në dukje se shfaqja e COVID-19 ka treguar që BE ka nevojë për instrumente më të fortë të përbashkët në sektorin shëndetësor.

“Kriza e shkaktuar nga COVID-19 zbuloi nevojën për instrumente shëndetësore të mirëmenduara dhe të financuara në mënyrë adekuate. Përveç kësaj, ne në përgjithësi kemi nevojë për më shumë inovacion dhe investime në shëndetësi. Ishte thelbësore që të rritet buxheti i programit të Shëndetit të BE nga 1.7 miliardë në 5.1 miliardë euro, në mënyrë që të mund të merremi me pandemitë e ardhshme dhe kërcënimet shëndetësore, duke i bërë sistemet tona shëndetësore më elastike,” tha ai.

Gjatë krizës koronare, u zbuluan një numër dobësish në sistemet shëndetësore kombëtare, përfshirë varësinë e tyre nga furnizimi me ilaçe, pajisje mjekësore dhe pajisje mbrojtëse personale nga vendet jo-BE.

Parlamenti tani duhet të fillojë negociatat me shtetet anëtare, përkatësisht Këshillin e BE-së, në mënyrë që programi të fillojë të zbatohet që në 2021.

 

loading...