Qeveria gjermane ka miratuar eksportet e armëve me vlerë më shumë se një miliard euro në vendet e përfshira në konfliktet në Jemen dhe Libi, njoftoi të dielën agjensia e lajmeve dpa.
Deri në 17 dhjetor, Berlini kishte miratuar shitjen e armëve dhe pajisjeve ushtarake me vlerë 725 milion euro vetëm në Egjipt, tha ministria e ekonomisë me kërkesë të deputetit të Bundestagut Omar Nouripour.
Eksportet e armëve në Katar (305.1 milion euro), Emiratet e Bashkuara Arabe (51.3 milion euro), Kuvajti (23.4 milion euro) dhe Turqia (22.9 milion euro) u miratuan gjithashtu.
Licencat u lëshuan poashtu për Jordaninë (1.7 milion euro) dhe Bahreinin (1.5 milion euro), duke e çuar vlerën totale të eksporteve të armëve në 1.16 miliardë euro.
Dy konflikte
Të gjitha këto vende janë të përfshira në një ose në të dy konfliktet – në Jemen dhe Libi, pohon dpa.
Në Jemen, një koalicion i udhëhequr nga Arabia Saudite po lufton Huseinin, një rebel pro-iranian. Koalicioni përfshin Emiratet e Bashkuara Arabe, Egjiptin, Kuvajtin, Jordaninë dhe Bahreinin.
Në konfliktin libian, Katari dhe Turqia ndërhyjnë në anën e qeverisë së njohur ndërkombëtarisht të kryeministrit Fayez al-Sarraj në Tripoli.
Nga ana tjetër, gjeneral Khalifa Haftar mbështetet nga Emiratet e Bashkuara Arabe dhe Egjipti. Një armëpushim është aktualisht në fuqi.
