Presidenti i Venezuelës Nicolas Maduro tha të premten se forcat e sigurisë së vendit kapën një “spiun amerikan” ndërsa po spiunonte rafineritë më të mëdha të naftës në vend.
Në një mesazh televiziv, Maduro tha se informatori i dyshuar u arrestua të enjten në veriperëndim të vendit ndërsa po spiunonte rafineritë Amuay dhe Cardon.
“U arrestua një marins, i cili shërbeu si marins në bazat e CIA-s në Irak”, tha Maduro, duke shtuar se “i arrestuari kishte “armë speciale, sasi të mëdha parash, shuma të mëdha dollarësh dhe gjëra të tjera” me vete.
Ai nuk dha detaje shtesë përveç asaj që i arrestuari dha një deklaratë në paraburgim.
As Departamenti i Shtetit dhe as Shtëpia e Bardhë nuk kanë komentuar ende mbi pretendimet e Maduros.
Sulm parandalues ndaj një rafinerie nafte
Maduro gjithashtu tha të premten se forcat e sigurimit të Venezuelës kishin prishur një plan për të shkaktuar një shpërthim në rafinerinë El Palito në shtetin e Carabobo ditët e fundit, por nuk dha detaje.
Një gjykatë e Venezuelës muajin e kaluar dënoi dy ish-anëtarë të Beretave të Gjelbra, një nga njësitë elitare të ushtrisë amerikane, me 20 vjet burg për pjesëmarrjen në një sulm të dështuar në Venezuelë në maj.
Venezuela është goditur nga sanksionet amerikane që kanë çuar në mungesa të karburantit edhe pse vendi është i pasur me naftë dhe qeveria njoftoi një iniciativë të re të premten për shpërndarjen e karburantit dhe planifikimin e projekteve të reja të rafinimit të naftës.
