Panorama.al sjell pamjet nga qyteti i Vlorës pas reshjeve të denduara të shiut që kanë shkaktuar përmbytje.
Në imazhet e publikuara shihen automjetet e zhytura në ujë, ndërsa trotuaret e përmbytura.
Qytetarët janë detyruar të ecin mes përmes ujit, ndërsa të tjerë janë ngjitur në shkallët e bizneseve në rrugë.
Reshjet e denduara kanë shkaktuar problematika edhe në qytete të tjera, si Tirana, Durrësi, Fieri dhe Mirdita.
Ministria e Mbrojtjes njofton se:
Rrikthimi i reshjeve intensive në një pjesë të madhe të territorit të vendit ka krijuar disa problematika.
Po punohet nga forcat në aksin rrugor Skuraj –Burrel, ku ka rënie masive gurësh dhe bllokim të rrugës, në fshatin Shkopet si dhe në njësinë administrative Milot, në Kurbin. Ka prani uji në oborret e disa banesave në Mirditë, për shkak të daljes së përroi të Zmejës nga shtrati.
Situata po monitorohet në Durrës, ku ka prani të ujit në disa rrugë, duke vështirësuar qarkullimin e mjeteve, kryesisht në zonën rreth stadiumit, Plazhit, Plepa, te “Ura e Dajlanit”.
Po ashtu po punohet për riparimin e defekteve në sistemin energjetik në disa zona në Kukës, Tropojë, Shkodër.
Të gjitha forcat janë në terren për të shmangur çdo problematikë që shfaqet.
