Autoritetet malazeze kanë vendosur të mbyllin kufijtë tokesorë me Shqipërinë dhe të lejojnë hyrjen tranzit në territorin malazez vetëm për shtetasit që posedojnë një dokument që rezultojnë negativ ndaj COVID-19, të bërë brenda 48 orëve.
Lajmi është bërë i ditur nga Ministria për Evropën dhe Punët e Jashtme, e cila njofton se njësia Operacionale kunder koronavirusit ne Mal të Zi ka vendosur të rishikojë listën e vendeve, shtetasit e te cileve do lejohen të hyjnë në territorin e ketij vendi.
Një vendim i tillë ka ardhur si pasojë e rritjes së numrit të rasteve të reja me koronavirus në vendin tonë, duke e kaluar 700 raste aktive, limit ky i vendosur më parë nga autoritetet malazeze dhe që e kalon shifrën 25 të infektuar për 100.000 banorë.
Ministria e Jashtme bën me dije se nga ky kufizim përjashtohen udhëtarët që kanë një funksion/nevojë thelbësore, si:- profesionistët shëndetësorë, kërkuesit mjekësorë; personeli i angazhuar me transportin e mallrave dhe çdo personel tjetër transporti; diplomatët, stafi i organizatave ndërkombëtare, personeli ushtarak dhe punonjës të ndihmës humanitare.
Vendimi për mbylljen e kufijve hyn në fuqi mesnatën e së dielës në datë 21 qershor dhe është i vlefshëm deri në një vendim të dytë të Njësisë Operacionale të Krizës në Podgoricë.
Në hartën e publikuar nga autoritetet malazeze qytetarëve nga Shqipëria, Kosova, Bosnje-Hercegovina, Turqia, Izraeli, Polonia, Rumania, Italia dhe Ukraina, u lejohet hyrja nëse posedojnë një test negativ ndaj Covid 19, ndërsa shtetasit e Serbisë e Maqedonisë së Veriut, e kanë të ndaluar hyrjen në Mal të Zi.