Pas dorëheqjes së Giuseppe Conte, Mario Draghi është personi i ngarkuar nga Presidenti i Italisë Sergio Matarella për të krijuar qeverinë e re.
Sipas mediave italiane, Draghi, ish kreu i Bankës Qëndrore Europiane, e ka pranuar me rezerva sfidën e re.
“Falenderoj besimin që më dha Presidenti i Republikës. Po kalojmë një moment të vështirë e për këtë qëllim i përgjigjem pozitivisht kërkesës së tij“, është shprehur ai.
Kush është Mario Draghi?
Mario Draghi ka mbajtur më herët postet e Presidentit të Bankës Qëndrore Europiane dhe atë të Guvernatorit të Bankës së Italisë.
Profesor universitar, prej vitit 2005 Mario Draghi ka drejtuar Bankën Italiane e prej vitit 2011 deri më 2019 ka qënë President i Bankës Qëndrore Europiane.
Ka meritën se mundi të shpëtojë euron pas një krize të thellë financiare europiane shkaktuar nga borxhi publik e që vuri në rrezik ekzistencën e monedhës së përbashkët europiane.
Në vitin 2012, në Londër do të deklaronte “se Banka Europiane ishte e gatshme të bënte gjithcka për të shpëtuar euron“.
Në vitin 2018 “Revista Forbes” e klasifikoi ndër 18 njerëzit më të fuqishëm të botës.
Shpresa e Presidentit Mattarella është që në këtë moment të vështirë ku ndodhet vendi, rënduar dhe nga kjo krizë qeverisëse, Mario Draghi të jetë rruga e shpëtimit për Italinë.
Mario Draghi ka deklauar publikisht se bindjet e tij politike janë për një socializëm liberal e se është një katolik i devotshmë.
Profesori dhe ekonomisti Mario Draghi, është i martuar dhe baba i dy fëmijëve.
/Ora News