Ish-kryeministri Sali Berisha ndërsa ju është drejtuar mbështetësve nga ballkoni i banesës së tij mbrëmjen e sotme, ka folur për negociatat me mazhorancën
Ai tha se këto ditë në parlament është bërë dialog në mënyrë që të drejtat e opozitës të respektohen.
Sipas tij Rama nuk ka pranuar të respektojë të drejtat kushtetuese dhe ka fituar më shumë se kushdo tjetër nga bojkoti i parlamentit nga opozita.
Gjithashtu ai theksoi se opozita nuk do ta braktisë parlamentin, por do bëjë çdo gjë për të drejtat e saj kushtetuese në parlament dhe kudo, ndërsa shtoi se “nuk ka forcë që të shpëtojë Ramën nga komisionet hetimore”.
“Këto ditë në parlament është bërë dialog në mënyrë që të drejtat e opozitës të respektohen.
Dua të sqaroj ju dhe çdo shqiptar se nuk është opozita ajo që ka shkelur të drejtat kushtetuese, as të vetat, as të kujt tjetër.
Është Edi Rama, i cili nuk pranon të respektojë të drejtat kushtetuese.
Në këto rrethana ai ka vetëm një qëllim dhe ky qëllim është që opozita të bojkotojë parlamentin.
Sepse, duhet të jemi realistë, në mënyrë makabër ai fitoi më shumë se kushdo tjetër nga bojkoti i parlamentit nga opozita.
Mirëpo unë i them sot Edi Ramës këtu para jush dhe në emër tuaj se opozita nuk braktis parlamentin, por opozita do bëjë çdo gjë për të drejtat e saj kushtetuese në parlament dhe kudo.
Prandaj dhe Edi Rama, ti ke frikë dhe tmerr nga komisionet hetimore.
Nuk ka forcë në botë që të shpëton prej tyre.
Le të vijë kushdo në mbrojtje tënde, ti do përfundosh para atyre komisioneve sepse ke vjedhur këtë komb, këtë vend sa askush tjetër në histori”, tha Berisha.
