Berat – Drejtoria Vendore e Policisë Berat ka bërë publike disa raste të reja të hetuara nga strukturat e saj, që përfshijnë vepra penale në fusha të ndryshme, nga mashtrimet me siguracionet, armëmbajtja pa leje, deri te kanosja dhe vjedhjet në objekte kulti.
1. Mashtrim me siguracion mjeti
Specialistët për Hetimin e Krimit Ekonomik dhe Financiar kanë referuar në Prokurori materialet për shtetasin E. G., 48 vjeç, banues në Berat. Ky i fundit, në cilësinë e agjentit të një kompanie sigurimesh, dyshohet se ka lëshuar një siguracion mjeti me të dhëna të falsifikuara. Për këtë vepër, ndaj tij ka nisur procedimi në gjendje të lirë.
2. Armë gjahu dhe mosbindje ndaj Policisë
Në Kuçovë, babë e bir ranë në telashe me ligjin. Gjatë një kontrolli në banesën e tyre, u gjetën fishekë arme gjahu. Babai, F. A., 49 vjeç, u procedua në gjendje të lirë, ndërsa djali i tij, 25 vjeç me të njëjtin emër, u shpall në kërkim për mosbindje ndaj urdhrit të Policisë.
3. Kanosje ndaj një shtetaseje 75-vjeçare
Një tjetër rast në Kuçovë përfshin shtetasin A. D., 38 vjeç, i cili dyshohet se ka kanosur për motive të dobëta një grua të moshuar, 75 vjeç. Edhe në këtë rast, është nisur procedimi në gjendje të lirë.
4. Denoncim për largimin e një 33-vjeçareje
Shtetasi I. L., 54 vjeç, ka bërë kallëzim se vajza e tij, M. L., 33 vjeç, është larguar nga banesa që më datë 22 maj 2025. Policia po punon për gjetjen dhe kthimin e saj të sigurtë në familje.
5. Vjedhje në një objekt kulti në lagjen “Mangalem”
Një tjetër denoncim ka ardhur nga një shtetase që kujdeset për mirëmbajtjen e një objekti kulti në lagjen historike “Mangalem”. Ajo ka raportuar se nga arka e këtij objekti janë vjedhur para. Policia po punon për identifikimin dhe kapjen e autorëve.
Të gjitha materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Berat, për vijimin e mëtejshëm të hetimeve.