Dr. Salvador Plasencia rrezikon të përballet deri në 40 vjet burg
Një mjek në Los Angeles ka rënë dakord të deklarohet fajtor për dhënien e ketaminës aktorit Matthew Perry para se të vdiste nga një mbidozë fatale, thanë prokurorët. Sipas BBC, Dr. Salvador Plasencia është një nga pesë personat e akuzuar për vdekjen e Perry-t, 54 vjeç, yllit të serialit televiziv të famshëm “Friends”, i cili u gjet i vdekur në vaskën e tij të nxehtë në shtëpi në tetor 2023.
Mjeku ligjor arriti në përfundimin se ketamina, së bashku me faktorë të tjerë, shkaktuan që aktori të humbiste ndjenjat dhe të mbytej. Perry e kishte marrë ligjërisht ilaçin nga mjeku i tij personal si një trajtim për depresionin, por kishte filluar të kërkonte doza më të larta se sa të përshkruarat.
Sipas raportit, Dr. Salvador Plasencia do të deklarohet fajtor për katër akuza për trafikim të ketaminës dhe përballet me deri në 40 vjet burg. Ai akuzohet se i ka furnizuar aktorit një sasi më të madhe të drogës në këmbim të mijëra dollarëve.
Sipas mesazheve me tekst midis Dr. Plasencia dhe Dr. Mark Chavez, Dr. Plasencia e quajti Matthew Perry-n një “idiot”. “Pyes veten se sa para të tjera do të jetë i gatshëm të paguajë”, shkroi ai. Chavez tashmë është deklaruar fajtor për trafikimin e ketaminës te Perry.
Dr. Plasencia dyshohet se i ka furnizuar Perry-t me ketaminë në shtëpinë e tij dhe në parkingun e Akuariumit Long Beach. Ai akuzohet gjithashtu se i ka mësuar asistentit të Perry-t, i cili është gjithashtu një i pandehur, si ta administrojë ilaçin dhe se i ka shitur Perry-t shishe shtesë për t’i mbajtur në shtëpinë e tij.
Mjeku është një nga pesë personat e akuzuar se janë pjesë e një rrjeti të paligjshëm të tregtarëve të drogës dhe punonjësve të kujdesit shëndetësor që furnizonin Perry-n me ketaminë. Të pandehur të tjerë, përfshirë Chavez dhe dy të tjerë, tashmë janë deklaruar fajtorë, dhe gjyqi i “mbretëreshës së ketaminës” Jaswin Sanga është planifikuar për gusht.
