Demokratët dhe socialistët janë ulur së bashku për të negociuar një ndarje të re territoriale të vendit.
Por pozicionet e tyre në nisje të kësaj reforme janë diametralisht të kundërta; demokratët prej vitesh kanë konsoliduar kërkesën për një numër më të madh bashkish dhe kërkesën për të rikthyer komunat; ndërkohë që mazhoranca mbështet ndarjen aktuale në 61 bashki, duke lënë të hapur idenë për një numër më të reduktuar.
ANILA DENAJ
BASHKEKRYETARE E KOMISIONIT TE REFORMES
“Reforma e vitit 2014 ka ndikuar në rritjen e eficencës së njësive vendore, por ndryshimet kanë nevojë për t’u diskutuar.”
DHURATA ÇUPI
BASHKEKRYETARE E KOMISIONIT TE REFORMES
“Në gjykimin tim është një reformë e dështuar dhe duhet t’i rikthehemi në themel.”
Vizioni krejt i ndryshëm që të dy palët kanë për ndarjen territoriale të vendit është një prej pengesave në reformën territoriale.
Pengesa tjetër është mungesa e kohës, pasi Komisionit i përfundon mandati në fillim të muajit gusht dhe palët kanë vetëm pak javë kohë për të gjetur kompromisin që nuk e gjetën në vitin 2014, kur opozita e bojkotoi këtë reformë.
Përtej kësaj, Partia Demokratike ulet e përçarë në tryezën e negociatave me mazhorancën; pasi në komisionin e reformës territoriale nuk janë përfshirë as deputetët që mbështesin Sali Berishën dhe as deputetët që kanë vendosur të mos rreshtohen as në krahun e Berishës dhe as në krahun e Enkelejd Alibeaj.
Në këtë situatë duket e vështirë që në zgjedhjet e ardhshme lokale të kemi një ndarje të re territoriale të pranuar nga të gjitha palët.
