Ditën e sotme, duke nisur nga ora 10:00 do të mbahet në Elbasan mbledhja e përbashkët mes dy qeverive, asaj të Shqipërisë dhe të Kosovës.
Takimi vjen pas disa përplasjeve në distancë mes Edi Ramës dhe Albin Kurtit në lidhje me procesin e Ballkanit të Hapur, ndërkohë që pritet të nënshkruhen një sërë marrëveshjes, përfshirë edhe atë për njohjen e sigurimeve shoqërore dhe lejet e qëndrimit dhe të punës me afat 5-vjeçar.
Në takim do të jenë të pranishëm të gjithë ministrat e dy qeverive. Kjo mbledhje e përbashkët e dy qeverive përkon dhe me 2-vjetorin e tërmetit shkatërrimtar në Shqipëri, ku humbën jetën më shumë se 50 persona dhe mijëra të tjerë mbetën të pastrehë.
Fax News ka siguruar marrëveshjet që pritet të nënshkruhen sot ndërmjet qeverive, lista e plotë e të cilave është më poshtë:
Marrëveshja ndërmjet Qeverisë së Republikës së Kosovës dhe Këshillit të Ministrave të Republikës së Shqipërisë për heqjen e lejeqëndrimit të përkohshëm
Marrëveshja ndërmjet Qeverisë së Republikës së Kosovës dhe Këshillit të Ministrave të Republikës së Shqipërisë për rregullimin e regjimit të trafikut lokal të kufirit
Marrëveshja ndryshuese e Marrëveshjes ndërmjet Këshillit të Ministrave të Republikës së Shqipërisë dhe Qeverisë së Republikës së Kosovës për hapjen e pikës së përbashkët të kalimit kufitar Shishtavec (Kukës) – Krushevë (Dragash)
Marrëveshje ndërmjet Këshillit të Ministrave të Republikës së Shqipërisë dhe Qeverise se Republikës së Kosovës “Për ndihmë të ndërsjelltë juridike në çështjet civile dhe tregtare”
Për miratim, në parim, të marrëveshjes, ndërmjet Republikes se Shqipërisë dhe Republikës së Kosovës, për sigurimet shoqërore
Marrëveshje ndërmjet Këshillit të Ministrave të Republikës së Shqipërisë dhe Qeverisë së Republikës së Kosovës për zbatimin e lehtësirave të ndërsjella në procedurat doganore dhe/ose të kontrollit të hyrje/daljes së mallrave
Kalendari i përbashkët Kulturor Vjetor Shqipëri-Kosovë, për vitin 2021-2022
Marrëveshje Bashkëpunimi: në fushën e Trashëgimisë Kulturore midis MKRS & MK.
Protokoll Bashkëpunimi Ndërmjet Këshillit të Ministrave të Republikës s Shqipërise dhe Qeverise së republikës se Kosovës për krijimin e Sekretariatit Koordinues Ndërqeveritar.
MoU për studimin e fizibilitetit për ndërtimin/rehabilitimin e segmentit hekurudhor Durrës-Prishtinë
Marrëveshje bashkëpunimi ndërmjet Ministrisë së Shëndetësisë dhe Mbrojtjes Sociale të Republikës së Shqipërisë dhe Institucionit kompetent të palës kosovare.
Marrëveshje dypalëshe për lehtësimin e procedurës së njohjes se diplomave nga IAL-te (te konfirmimit të të diplomuarve nga Qendrat Kombëtare respektive të Njohjes së Diplomave)
Manual i Përbashkët për procedurat standarde të operimit në Doganën e Durrësit.
Manuali Për procedurat standarde te operimit ne piken e përbashket te kalimit kufitar (PPKK) Morine-Vermice
Marrëveshje dypalëshe për qasje të ndërsjellë në modulet e riskut
Marrëveshje bashkëpunimi ndërmjet Drejtorisë së Përgjithshme të Arkivave të RSH dhe Agjencisë Shtetëror të Arkivave të Republikës së Kosovës.
Sipas agjendës në orën 09:45 mbërrin delegacioni i Republikës së Kosovës.
Në orën 10:00 zhvillohet ceremonia e pritjes së kryeministrit të Republikës së Kosovës Albin Kurti, nga kryeministri i Shqipërisë, Edi Rama.
Më pas vijohet me luajtjen e himneve kombëtare dhe nderimet ushtarake nga Truproja e Nderit e Republikës së Shqipërisë
Në orën 10:10 zhvillohet çelja e sesionit plenar të mbledhjes së dy qeverive Shqipëri-Kosovë
Në orën 11:20 zhvillohet ceremonia e nënshkrimit të marrëveshjeve ndërqeveritare.
Në orën 11:30 mbahet konferenca e përbashkët për shtyp e dy kryeministrave.
Në orën 12:05 do të ketë foto të përbashkët.
Në orën 13:10 nis forumi i Biznesit Shqipëri–Kosovë, ku do të ketë bashkëbisedim mes kryeministrit të Shqipërisë, Edi Rama dhe kryeministrit të Kosovës, Albin Kurti me përfaqësuesit e bizneseve.
Kjo do të jetë mbledhja e 7-të e përbashkët mes dy qeverive, ku pritet të nënshkruhen edhe disa marrëveshje të rëndësishme.
Në mbledhjen e dy qeverive marrëveshjet të cilat do të firmosen, do të prekin fusha si ekonomia, bashkëpunimi diplomatik dhe konsullor, arsimi, drejtësia, shkenca apo kultura.
Mbledhja e parë e përbashkët mes dy qeverive, asaj të Kosovës dhe të Shqipërisë, u mbajt më 11 janar 2014 dhe u cilësua si takim historik./Faxweb.al
…
/faxweb
