Mbreti Abdullah i Jordanisë njoftoi të mërkurën se rebelimi ishte shuar pas një mosmarrëveshje me gjysmë-vëllain e tij dhe ish0Princin Hamza, dhe se vendi i tij tani është i qëndrueshëm dhe i sigurt.
Në deklaratën e parë pasi afera u shfaq në publik, monarku tha se kriza që tronditi stabilitetin e mbretërisë ishte “më e dhimbshmja” sepse u shfaq brenda familjes mbretërore dhe jashtë saj.
“Asgjë nuk është as afër asaj që ndjeva – tronditje, dhimbje dhe zemërim – si një vëlla dhe kujdestar i familjes Hashemite dhe udhëheqësi i këtij populli të dashur”, tha Mbreti Abdullah në një letër dërguar kombit, botuar nga Reuters.
Zëdhënësja e Shtëpisë së Bardhë Jen Psaki gjithashtu tha se Presidenti Biden kishte folur me Mbretin Abdullah dhe se një transkript i bisedës së tyre pritet së shpejti.
Pallati Mbretëror tha se Abdullah mori një telefonatë nga Biden “duke shprehur solidaritetin e plotë të vendit të tij me Jordaninë dhe përpjekjet e tij për të ruajtur stabilitetin”.
Ushtria tha më herët se kishte lëshuar një paralajmërim për princin për veprimin kundër “sigurisë dhe stabilitetit” jordan, një vend që është një aleat kryesor i SHBA në rajon.
Princi Hamza më vonë tha se ai ishte në arrest shtëpiak dhe disa zyrtarë të tjerë të lartë gjithashtu u arrestuan.
Qeveria tha se kishte parandaluar një komplot destabilizues që përfshinte Princin Hamza.
Hetimet treguan se veprimtaritë e Hamza dhe të tjerëve ishin të drejtuara kundër stabilitetit dhe sigurisë së mbretërisë dhe se ata ishin në kontakt me “palët e huaja”, thanë autoritetet më parë.
Ushtria jordaneze mohoi që Hamza ishte në arrest shtëpiak, por tha se atij iu kërkua të përmbahej nga aktivitetet që mund të dëmtonin stabilitetin e mbretërisë.
Në videot e regjistruara, Hamza tha se nga ushtria u urdhërua që të mos largohej nga shtëpia dhe të mos komunikonte me askënd.
Të hënën në mbrëmje, gjykata mbretërore lëshoi një deklaratë të nënshkruar nga Hamza duke rikonfirmuar besnikërinë e tij ndaj Mbretit Abdullah.
