Mbreti Abdullah II i Jordanisë përsëriti dje se vendi i tij refuzon çdo përpjekje për të ndarë Bregun Perëndimor nga Rripi i Gazës.
Në një mesazh drejtuar kreut të Komitetit për Ushtrimin e të Drejtave të Pamohueshme të Popullit Palestinez (CEIRPP), Mbreti Abdullah II pohoi se Bregu Perëndimor dhe Gaza “janë një pjesë e shtetit palestinez”.
“Vlerat e të gjitha feve hyjnore dhe vlerat tona të përbashkëta njerëzore hedhin poshtë vrasjen e civilëve”, shtoi ai, sipas Oborrit Mbretëror të Jordanisë.
Më tej, ai u shpreh se “agresionet e Izraelit në Bregun Perëndimor dhe Rripin e Gazës kundërshtojnë ligjin ndërkombëtar humanitar dhe do të ndezin dhunën dhe shkatërrimin e mëtejshëm në rajon dhe në botë”.
Mbreti jordanez shtoi se Dita Ndërkombëtare e Solidaritetit me Popullin Palestinez “vjen në rrethana të jashtëzakonshme që i bëjnë thirrje botës të veprojë për të ndaluar luftën dhe për të detyruar Izraelin të heqë bllokadën në Rripin e Gazës”.
Ai përsëriti refuzimin e Jordanisë për “ripushtimin e pjesëve të Gazës ose krijimin e zonave tampon në të dhe ndarjen e Bregut Perëndimor nga Gaza”.
Populli palestinez dhe mbështetësit e tij në mbarë botën shënojnë sot Ditën Ndërkombëtare të Solidaritetit me Popullin Palestinez. Kjo ditë shënon miratimin e rezolutës në Asamblenë e Përgjithshme të OKB-së në vitin 1947, ku bëhet thirrje për ndarjen e Palestinës në shtete “arabe” dhe “hebraike”.
Izraeli nisi fushatë masive ushtarake në Rripin e Gazës pas një sulmi ndërkufitar nga Hamasi më 7 tetor. Që atëherë ka vrarë mbi 15 mijë palestinezë, përfshirë 6.150 fëmijë dhe 4 mijë gra, sipas autoriteteve shëndetësore në enklavë.
Numri zyrtar i të vdekurve në Izrael është 1.200.
Burimi: AA
