Ministrja e arsimit Ogerta Manastirliu njoftoi sot mbylljen e përkohshme të platformës TikTok në vendin tonë.
Qeveria vendosi ndërprerjen e aksesit në TikTok në territorin e Shqipërisë për një periudhë 12-mujore, deri në momentin që kjo platformë të zbatojë standardet e sigurisë dhe moshës për përdoruesit e mitur.
Lidhur me këtë vendim të qeverisë foli sot në studion e News 24, gazetari Osman Stafa.
Teksa e cilësoi vendimin ekstrem, Stafa tha se ky veprim nuk adreson problemin kryesor që çoi në vendimin përkatës.
Kujtojmë se qeveria propozoi mbylljen e TikTok pas vrasjes së 14-vjeçarit Martin Cani, i cili u vra nga bashkëmoshatari i tij në shkollë, pas një debati që ata kishin në rrjete sociale. Por me sa duket Martini nuk kishte TikTok.
Gazetari duke cituar fjalët e babait të Martinit, tha se adoleshneti i ndjerë nuk ishte përdorues i TikTok.
“Babai i Martin Canit më shkruan tani dhe më thotë se djali i tij nuk ka pasur TikTok. Edhe për Snapchat-in më thotë se nuk ka pasur informacion se ka qenë përdorues i këtij aplikacioni…për mua Snapchat është platformë më e rrezikshme. Duhet të kuptojmë qartazi se cili është interesi i qeverisë, që e mbyll TikTok 2 muaj para zgjedhjeve…Pra si ka mundësi që mbyllet TikTok dhe jo Snapchat?”, tha gazetari.
