Vitaminat dhe lëndët ushqyese më të mira për shëndetin e trurit tuaj, sipas ekspertëve.
Një dietë e shëndetshme është vetëm një pjesë e enigmës në reduktimin e rrezikut të demencës. Kur bëhet fjalë për të mbajtur trurin tuaj të shëndetshëm ndërsa plakeni, dieta juaj luan një rol të madh. Ngrënia e një shumëllojshmërie ushqimesh është e domosdoshme për marrjen e vitaminave dhe lëndëve ushqyese, që trurit tuaj i nevojiten për të vazhduar performancën më të mirë. Por vitaminat më të mira për shëndetin e trurit mund të ndihmojnë.
Hulumtimet kanë gjetur se “disa lëndë ushqyese, flavonoidë, yndyrna të pangopura dhe acide yndyrore omega-3 janë të lidhura me rënie më të ngadaltë njohëse dhe reduktim të rrezikut të demencës”, thonë studiuesit.
Edhe pse ngrënia e ushqimeve është mënyra më e mirë, suplementet për shëndetin e trurit mund të jenë një opsion i dobishëm në rrethana specifike.
“Në përgjithësi, suplementet nuk janë shpesh të dobishme për shëndetin e trurit, nëse nuk keni mungesë në disa lëndë ushqyese, gjë që ndodh por është e rrallë”, thotë Gill Livingston, M.D., një profesor i psikiatrisë në University College London.
Pra, cilat vitamina mbështesin shëndetin e trurit?
Acidet yndyrore omega-3
Nëse e keni pyetur ndonjëherë veten pse peshqit e yndyrshëm si salmoni dhe toni gjithmonë reklamohen si pjesë e një diete të shëndetshme, ja një arsye: ata janë të pasur me acide yndyrore omega-3. Acidet yndyrore omega-3 depërtojnë lehtësisht në barrierën gjak-tru dhe janë thelbësore për strukturën dhe funksionimin e trurit.
Përveç peshkut të yndyrshëm, burime të mira të omega-3 përfshijnë arrat dhe farat dhe disa ushqime si vezët dhe kosi. Nëse je dikush që nuk ha shpesh ushqime deti, konsultohu me mjekun për marrjen e një suplementi omega-3 nëse analizat e gjakut tregojnë se keni mungesë.
Vitamina E
Kjo vitaminë funksionon si një antioksidant në trup dhe mbron qelizat nga stresi oksidativ, një lloj dëmtimi i shkaktuar nga radikalet e lira (molekula të paqëndrueshme në trup), madje edhe në trurin e njerëzve me sëmundjen Alzheimer. Truri është veçanërisht i ndjeshëm ndaj stresit oksidativ, i cili rritet gjatë plakjes dhe është një kontribues kryesor në rënien njohëse. Vitamina E është gjithashtu anti-inflamatore, e cila ndihmon në mbajtjen e ADN-së të shëndetshme dhe riprodhimin e duhur, ndërkohë që ruan strukturën e membranave të shëndetshme të qelizave të trurit.
Ku mund ta gjeni: Vitamina E mund të gjendet në zarzavate me gjethe jeshile, avokado, spec i kuq, shpargu, mango, kungulli, arrat dhe farat.
Vitaminat B
Kur bëhet fjalë për shëndetin e trurit, fokusohuni në tre B-të: vitaminat B6, B12 dhe B9 (folati). Këto tre lloje të vitaminave B janë të nevojshme për funksionimin normal të trurit. Çdo mungesë mund të rrisë rrezikun e humbjes së kujtesës dhe formave të tjera të rënies njohëse. Këto vitamina ndihmojnë në rritjen e prodhimit të neurotransmetuesve, ose kimikateve të trurit, që japin mesazhe midis trurit dhe trupit.
Ku t’i gjeni: Fasulet janë një nga burimet më të mira të vitaminave B në të gjithë botën. Ju mund të gjeni B6 në banane, portokall, papaja, pjepër, ton, salmon, shpendë dhe zarzavate me gjethe të errëta. Folati gjendet në brokoli, zarzavate, drithëra, vezë, kikirikë dhe fara luledielli. Vitamina B12 gjendet vetëm në mish dhe në produktet e peshkut. Njerëzit në një dietë me bazë bimore kanë një rrezik shumë më të lartë të mungesës së vërtetë të B12, kështu që bisedoni me mjekun ose dietologun tuaj nëse një shtesë B12 është apo jo e duhura për ju.
Vitaminë C
Ky antioksidant është i njohur për fuqitë e tij imunitare, por vitamina C dhe flavonoidet e tjera gjithashtu mbështesin trurin, potencialisht duke zbutur inflamacionin që dëmton trurin.
Ku ta gjeni: Merrni vitaminë C me bollëk nga kivi, specat e kuq dhe jeshil, agrumet, manaferrat, brokoli, lulelakra, lakra brukseli dhe domatet.
Shumica e ekspertëve pajtohen se është gjithmonë më mirë të shpenzoni paratë tuaja për ushqime, por ka përjashtime. Nëse zgjidhni të merrni një suplement për shëndetin e trurit, është e rëndësishme të konsultoheni me një profesionist mjekësor. /Gazeta Shëndeti
