Mijëra shqiptarë në Londër kanë festuar mbrëmjen e djeshme pavarësinë, duke “pushtuar” rrugët e kryeqytetit britanik. Por mediat në Britaninë e Madhe raportojnë se policia ka arrestuar disa persona, të cilët kanë hedhur fishekzjarrë.
Sipas Daily Mail, rrugët rreth Westminsterit u bllokuan nga turmat e njerëzve që valëvitnin flamuj shqiptarë dhe ndiznin fishekzjarrë, me Audi, Mercedes dhe makina sportive të konvertueshme që shiheshin duke lëvizur në trotuar dhe duke i rënë borive.
“Disa njerëz u panë duke valëvitur flamuj teksa qëndronin sipër automjeteve në lëvizje, ndërsa trafiku i rregullt në përpjekje për të kaluar nëpër kryeqytet u ndal pasi tubimi shkaktoi mbylljen e rrugëve”, shkruan tabloidi britanik.
Policia Metropolitane konfirmoi se arrestoi shumë persona që hodhën fishekzjarre drejt turmës, ndërsa të tjerë dyshohet se hodhën shishe drejt oficerëve.
Policia lëshoi një urdhër shpërndarjeje në rrugët e Londrës qendrore, duke u dhënë oficerëve më shumë fuqi për t’i detyruar njerëzit të largohen nga zona ose t’i ndalojnë nëse refuzojnë.
