Emiri i Katarit, Sheik Tamim bin Hamad Al Thani, ka telefonuar Mbretin e Arabisë Saudite, Salman bin Abdulaziz, për t’ia uruar muajin e Ramazanit.

Dy udhëheqësit kanë shkëmbyer urime me rastin e muajit të agjërimit, njoftoi agjencia zyrtare saudite SPA, ndërkohë që kjo është biseda e parë midis emirit katarian dhe mbretit saudit që nga pajtimi midis vendeve të Gjirit.

Në qershor të vitit 2017, vendet arabe si Arabia Saudite, Emiratet e Bashkuara Arabe, Bahreini dhe Egjipti e akuzuan Katarin për “mbështetje të grupeve terroriste” dhe i ndërprenë të gjitha lidhjet diplomatike me vendin, duke vendosur embargo ekonomike.

Gjendja krijoi një krizë në rajonin e Gjirit, ndërkohë që Katari mohonte të gjitha akuzat.

Përpjekjet për t’i dhënë fund krizës dhanë fryte në fillim të këtij viti.

Më 4 janar, ministri i Jashtëm i Kuvajtit, Ahmed Nasser Mohammed al-Sabah, njoftoi se është arritur një marrëveshje për të hapur kufijtë tokësorë, detarë dhe ajrorë midis Arabisë Saudite dhe Katarit.

Ndërkaq, ministri i Jashtëm i Arabisë Saudite, Faisal bin Farhan Al Saud, njoftoi në Samitin e 41-të të Këshillit të Bashkëpunimit të Gjirit (GCC) të mbajtur në qytetin Al-Ula më 5 janar se vendet që kishin vendosur embargo ndaj Katarit kanë rivendosur marrëdhëniet diplomatike me Dohan dhe se embargoja është hequr.