Deklaratat për gazetën “Panorama” e të ngarkuarit me punë në ambasadën amerikane në Tiranë, David Wisner nuk kanë kaluar pa vëmendje.
LEXO INTERVISTEN E PLOTE: Ekskluzive/ “Krenarë që mbështesim SPAK, po i vjen fundi pandëshkueshmërisë”- David Wisner: Sanksionet ‘non grata’ për të korruptuarit do të vazhdojnë
Të pyetur nga “News 24”, qytetarët kanë komentuar mesazhet e rëndësishme të diplomatit amerikan dhënë për politikën dhe shoqërinë shqiptare. Wisner u shpreh se Shtetet e Bashkuara të Amerikës investuan për reformën në drejtësi dhe mbështesin fort SPAK-un në hetimet ndaj korrupsionit në nivelet më të larta të qeverisjes dhe krimit të organizuar.
Qytetarët mendojnë Amerika ka merita të veçanta në reformën në drejtësi. Një qytetar shprehet se: “Në sajë të Amerikës po ecën Shqipëria”. Sipas tij, Amerika po e çon përpara vendin tonë. Një tjetër kryeqytetas beson se Shtetet e Bashkuara të Amerikës kanë meritë të madhe në reformën në drejtësi dhe i vendosi pikat kësaj reforme. “Pa Amerikën nuk do të bëhej reforma në drejtësi”, – thotë ai.
Një tjetër banor deklaron për mikrofonin e “News 24” se SPAK-u duhet të godasë politikanët si majtas, ashtu edhe djathtas pa dallime politike. Njëri prej tyre i bën thirrje SPAK-ut: “T’u nxjerrë ujin e zi të korruptuarve dhe se me SPAK-n nuk kanë parë gjë akoma”.
Qytetarë të shumtë folën edhe për situatën e fundit politike dhe në mënyrë të veçantë bllokimin e Kuvendit. Ata apelojnë për një opozitë të fortë dhe energjike, teksa partisë në pushtet i kujtojnë se opozita ka të drejtën e hetimit parlamentar. “PS-ja ka frikë nga komisionet hetimore parlamentare të cilat duhet të funksionojnë”, – tha një qytetarë.
I ngarkuari me punë i Ambasadës së SHBA-ve në Tiranë, David Wisner ka zgjedhur Ditën Ndërkombëtare kundër Korrupsionit për të dhënë disa mesazhe të rëndësishme për politikën dhe shoqërinë shqiptare. Wisner thekson se korrupsioni kërcënon sigurinë kombëtare të SHBA-ve dhe Shqipërinë dhe mbështet fort SPAKun në hetimet ndaj korrupsionit në nivelet më të larta të qeverisjes dhe krimit të organizuar.
“Mendoj se SPAK-ut i takon një meritë shumë e madhe për përpjekjet e tij. Provat janë te rezultatet. Po shohim më shumë dënime, më shumë sekuestrime, më shumë konfiskime, më shumë hetime dhe më shumë bashkëpunim ndërkombëtar në fushën e zbatimit të ligjit, çka do të thotë se SPAK po zhvillon reputacionin si organ serioz, i besueshëm ligjzbatimi me të cilin vendet e tjera mund të hyjnë në partneritet për të luftuar krimin e organizuar ndërkombëtar dhe korrupsionin. Partnerët amerikanë dhe të tjerë ndërkombëtarë po rrisin bashkëpunimin me Shqipërinë si rezultat i kësaj. Kur njerëzit që kryejnë korrupsion si dhe figurat e krimit të organizuar hetohen, ngrihet padi kundër tyre, arrestohen, dënohen – këto tregojnë se ditët e pandëshkueshmërisë po i afrohen fundit. Po ashtu, u dërgohet një mesazh edhe aktorëve të tjerë të korruptuar”, – deklaroi diplomati amerikan.
I pyetur nga “Panorama” për deklaratat e Berishës dhe Ramës ndaj SPAK, Wisner refuzoi t’i përgjigjet të parit, sipas tij, sepse është i sanksionuar për korrupsion madhor, ndërsa si përgjigje për Ramën, ai thotë se janë 40 ekspertë amerikanë që financohen nga SHBA-të në mbështetje të drejtësisë, përfshirë edhe mbështetjen e Departamentit të Drejtësisë, Departamentit të Shtetit, FBI, DEA etj.. Wisner thekson se marrëdhëniet mes SHBA-ve e Shqipërisë janë më të forta se kurrë ndonjëherë si dhe përgjigjet për ngërçin në Parlament dhe zërave se ndërkombëtarët mbështesin stabilokracinë në kurriz të standardeve demokratike në Shqipëri.
