“Mos e sulmoni Izraelin. Mos e bëni këtë”, është mesazhi që presidenti amerikan Joe Biden i dërgoi Iranit të premten, në një përpjekje tjetër për të paralajmëruar Teheranin për pasojat.
Presidenti amerikan theksoi se “ne jemi të përkushtuar të mbrojmë Izraelin. Ne do ta mbështesim Izraelin dhe do të ndihmojmë në mbrojtjen e tij dhe Irani nuk do të ketë sukses”. I pyetur se sa i menjëhershëm mund të jetë një sulm hakmarrës iranian kundër Izraelit, ai tha se nuk donte të hynte në informacione të klasifikuara, por besonte se do të ndodhte herët a vonë.
#BREAKING: President Biden says he expects an attack by Iran “sooner rather than later.”
Says Iran will not succeed and that the US is devoted to the defense of Israel.
In a message to Iran, Biden says, “Don’t!” pic.twitter.com/XNEqXZslbn
— Moshe Schwartz (@YWNReporter) April 12, 2024
Kërcënimi i Iranit për t’u hakmarrë kundër Izraelit për sulmin ndaj konsullatës së tij në Damask po rrit më tej tensionet në Lindjen e Mesme, duke nxitur thirrje për përmbajtje, ndërkohë që mbetet për t’u parë nëse do të bëhet përparim në përpjekjen një armëpushim në Gaza, të paktën përkohësisht.
Irani po “kërcënon të nisë një sulm të madh kundër Izraelit”, tha presidenti amerikan Joe Biden në fillim të kësaj jave, duke riafirmuar mbështetjen e SHBA për aleatin e tij të ngushtë pavarësisht tensioneve midis dy qeverive mbi mënyrën se si kryhen operacionet ushtarake izraelite në Rripin e Gazës.
Në të njëjtën kohë, SHBA-të po dërgojnë përforcime në rajonin e Lindjes së Mesme pasi frika intensifikohet për një sulm të mundshëm nga Irani ndaj Izraelit, të cilin Teherani e fajëson për sulmin vdekjeprurës në konsullatën iraniane në Damask.
“Ne po vendosim forca shtesë brenda rajonit për të rritur përpjekjet rajonale të parandalimit dhe për të rritur mbrojtjen e forcave amerikane,” tha një zyrtar i mbrojtjes amerikane, duke folur në kushte anonimiteti. Zyrtari nuk ka specifikuar se për çfarë lloj ndihme bëhet fjalë.
Më herët, zëdhënësi i Shtëpisë së Bardhë, John Kirby tha se “kërcënimet e Iranit për të sulmuar Izraelin janë të besueshme dhe reale”, por nuk dha hollësi për kohën ose objektivat e një sulmi të tillë. Siç tha ai, Joe Biden “është informuar në mënyrë të përsëritur nga ekipi i sigurisë kombëtare dhe SHBA synon të bëjë gjithçka që është e mundur për të siguruar që Izraeli të mund të mbrohet”.
Kujtohet se në një raport të Wall Street Journal thuhet se Izraeli po përgatitet për një sulm të mundshëm në pjesën e tij jugore apo veriore, ndërsa kreu i diplomacisë amerikane, Anthony Blinken, i kërkon Kinës, Turqisë dhe Arabisë Saudite që të bëjnë presion ndaj Iranit që të mos vazhdojë me sulmin ndaj Izraelit.
Në të njëjtën kohë, Izraeli është vënë në gatishmëri të lartë, nën kërcënimin e një sulmi të mundshëm iranian. Sipas asaj që raporton rrjeti amerikan CBS Neës, duke cituar zyrtarë amerikanë, Irani mund të sulmojë duke përdorur më shumë se 100 dronë, dhjetëra raketa lundrimi dhe ndoshta raketa balistike kundër objektivave ushtarake në Izrael.
“Unë nuk mund të flas për madhësinë, shkallën dhe shtrirjen e këtij sulmi të mundshëm,” tha zëdhënësi i Këshillit të Sigurisë Kombëtare të Shtëpisë së Bardhë, John Kirby, duke theksuar megjithatë se kërcënimi iranian vlerësohet si “i besueshëm” dhe “real” dhe se Uashingtoni është “duke monitoruar sa më afër situatën”.
Në të njëjtën kohë, në një klimë të tillë tensionesh të shtuara dhe nën frikën e sulmeve të kërcënuara, vende si SHBA, Britania e Madhe, India, Australia, paralajmëruan qytetarët e tyre që të mos udhëtojnë në Izrael dhe Iran gjatë kësaj periudhe.
