Për të kuptuar se çfarë po ndodh në ishullin Evia në Greqi, mjafton të shohim këtë intervistë prekëse të bërë mes një gazetare e një të moshuari atje, i cili refuzon të ‘dorëzojë’ shtëpinë e tij tek flakët.
Mijëra janë larguar nga ishulli për shkak të flakëve, ndërsa ky i moshuar mundohet më kot që të lagë me ujë tokën përreth shtëpisë që zjarri të mos i marrë banesën. Kur gazetarja i afrohet dhe i thotë se ka dalë njoftimi për t’u evakuuar, i moshuari mezi flet. Ka dukshëm probleme serioze me frymëmarrjen.
Ky është momenti prekës kur i moshuari nis të përlotet e kur gazetarja shpërthen në të qara.
Më poshtë e gjithë biseda mes gazetares e të moshuarit si dhe intervista e plotë, dhënë në Open tv
Gazetarja: Është dhënë një urdhër nga autoritetet për evakuimin e njerëzve, por duke pyetur shumë njerëz këtu në Evia, disa thonë që e kanë marrë njoftimin e disa të tjerë jo.
Po të shikojmë që lag shtëpinë rreth e rrotull prej shumë orësh
I moshuari: Po lag vendin vërdallë që të mos më digjet shtëpia
Gazetarja e ripërsërit edhe njëherë se çfarë thotë i moshuari, ndërsa ky i fundit i tregon se s’mund të flasë
“Kam probleme me frymëmarrjen”-i tregon i moshuari, ndërsa gazetarja i thotë se duhet të vërë maskë me gjithë këtë tym që ka në ajër
I moshuari: E kam bërë shtëpinë det. Që nga dreka hedh ujë vërdallë. Gjumë nuk bëj sepse kam frikë, jo për veten, por për shtëpinë.
Gazetarja: Po por ju duhet të ikni, ju keni probleme me frymëmarrjen. Çfarë do t’i bëni më shtëpisë? Do të vijoni ta lagni shtëpinë?
I moshuari: Do iki në mëngjes, do të shkoj në Athinë
Gazetarja: Por ju duhet të ikni, keni probleme me frymëmarrjen
I moshuari: Dhe ku të shkoj?
Gazetarja: Të ikni dhe nëse nuk keni mundësi ju transportojmë dhe ne, vetëm që të largoheni nga këtu…
“Do iki, do iki për pak”- i thotë i moshuari e më pas nis të qajë. Me të parë të moshuarin, gazetarja po ashtu shpërthen në lot.
“Të lutem mos qaj, unë do të të ndihmoj”-i thotë gazetarja.
