NATO dhe Bashkimi Evropian dënuan një inkursion të avionëve luftarakë rusë në Estoni dhe shprehën solidaritet me vendin baltik.
“Avionët rusë shkelën hapësirën ajrore të Estonisë. NATO reagoi menjëherë dhe interceptoi avionin rus”, njoftoi një zëdhënëse e NATO-s në X, duke shtuar: “Ky është një tjetër shembull i sjelljes së pamatur ruse dhe aftësisë së NATO-s për të reaguar.”
Kaja Kallas, Përfaqësuesja e Lartë e Bashkimit Evropian për Punët e Jashtme dhe Politikën e Sigurisë, e cila ishte gjithashtu Kryeministre e Estonisë nga viti 2021 deri në vitin 2024, komentoi gjithashtu mbi tensionet e reja.
“Shkelja e hapësirës ajrore estoneze nga avionët ushtarakë rusë është një provokim jashtëzakonisht i rrezikshëm. Putini po vë në provë vendosmërinë e Perëndimit, ne nuk duhet të tregojmë dobësi”, vlerësoi ajo, duke shtuar se BE qëndron plotësisht në solidaritet me Estoninë.
Dhe në Nju Jork, një gazetar i Reuters e pyeti ambasadorin e Rusisë në Kombet e Bashkuara, Vassily Nebenzia, për këtë. Ai tha se nuk ishte në dijeni të incidentit, por tha se “nuk e beson atë që Estonia po thotë për Rusinë”.
I pyetur në lidhje me akuzën e Estonisë se Rusia kishte hyrë në hapësirën e saj ajrore me aeroplanët e saj, Nebenzia tha: “Sa tragjike”.
Nga ana tjetër, aeroplanët polakë dhe aleatë u ngritën herët të shtunën për të mbrojtur hapësirën ajrore polake pasi Rusia nisi sulme ajrore në Ukrainën perëndimore pranë kufirit polak, tha anëtari i NATO-s.
“Aeroplanët polakë dhe aleatë po kryejnë operacione në hapësirën tonë ajrore, dhe sistemet e mbrojtjes ajrore tokësore dhe të zbulimit me radar janë në gatishmëri të lartë”, njoftoi komanda operative polake në X.
Kujtojmë se ditë më parë, dronë rusë u shfaqën në territorin polak, një vend që përflitet si një shënjestër e mundshme ruse pas Ukrainës. Polonia është ndër të tjera dhe një vend i bazave ushtarake amerikane në Europë. /tesheshi.com/