Ministri i Jashtëm turk Hakan Fidan u takua me homologët e tij nga Iraku dhe Irani sot në qytetin Xhide të Arabisë Saudite, ku po merrte pjesë në një seancë urgjente të Organizatës së Bashkëpunimit Islam (OBI).
Fidan u takua me ministrin Fuad Husein të Irakut dhe Hossein Amir-Abdollahian të Iranit në margjinat e takimit të OBI-së, njoftoi ministri turk në rrjetin social “X”, duke shpërndarë fotografi nga takimet.
Më herët, Fidan duke iu drejtuar seancës urgjente, bëri thirrje për një “armëpushim të pakushtëzuar” për të ndaluar humbjen e jetëve të civilëve në Gaza.
“Ajo që po shpaloset në Gaza është shkelje e rëndë e çdo forme të ligjit ndërkombëtar”, tha ai.
Takimi urgjent i OBI-së u thirr në përgjigje të tensioneve në rritje midis Izraelit dhe Palestinës.
Ndërkohë, Fidan foli në telefon edhe me ministrin e Jashtëm të Argjentinës, Santiago Cafiero, thanë sot burime diplomatike.
Ministri turk dhe ai argjentinas diskutuan zhvillimet në Izrael dhe Palestinë, si dhe sulmet izraelite në Gaza.
Në një komunikatë përfundimtare të lëshuar pas takimit të jashtëzakonshëm të Komitetit Ekzekutiv të OBI-së, blloku bëri thirrje për heqjen e menjëhershme të rrethimit të Izraelit në Rripin e Gazës.
Gaza aktualisht po përjeton një krizë të rëndë humanitare pa energji elektrike, ndërsa uji, ushqimi, karburantet dhe furnizimet mjekësore po mbarojnë.
Të paktën 471 njerëz u vranë dhe 342 të tjerë u plagosën në një sulm ajror izraelit në Spitalin Baptist Al-Ahli në Gaza të martën vonë, sipas Ministrisë së Shëndetësisë në Gaza. Izraeli, megjithatë, ka mohuar përgjegjësinë për sulmin ajror.
Konflikti në rajon filloi më 7 tetor kur Hamasi filloi operacionin “Tufani i Aksasë”, një sulm i befasishëm me shumë drejtime që përfshinte një breshëri raketash dhe infiltrimesh në Izrael nga toka, deti dhe ajri. Hamasi ka thënë se inkursioni ishte në hakmarrje për bastisjet në Xhaminë Al-Aksa dhe dhunën në rritje të kolonëve izraelitë.
Ushtria izraelite më pas nisi operacionin “Shpatat e Hekurta” në Rripin e Gazës.
Shefi i OKB-së Antonio Guterres ka bërë thirrje për një “armëpushim të menjëhershëm humanitar” për të lehtësuar “vuajtjet epike njerëzore”.
Të paktën 3.478 palestinezë janë vrarë në sulmet izraelite në Gaza, ndërsa shifra qëndron në më shumë se 1.400 njerëz në Izrael.
Burimi: AA
