Ministri lituan i Mbrojtjes, Arvydas Anusauskas, tha se vendi i tij mbështet fuqishëm Ukrainën për të arritur fitoren në luftën me Rusinë.
“Lituania do të qëndrojë me Ukrainën. Kievi duhet ta fitojë këtë luftë ose siguria e gjithë rajonit do të kërcënohet”, tha Anusauskas në një deklaratë për Anadolu.
Anusauskas tha se shumë vende aleate kohët e fundit kanë marrë vendime historike për të rritur ndjeshëm shpenzimet e tyre të mbrojtjes.
Duke theksuar se qeveria lituane ka ndërmarrë hapa të fortë në shpenzimet e mbrojtjes, Anusauskas shtoi se ata synojnë të arrijnë 3 për qind të produktit të brendshëm bruto (PBB) të vendit.
Ai më tej theksoi se Rusia është një kërcënim i drejtpërdrejtë, i rëndësishëm dhe afatgjatë.
“Lituania kufizohet me Kaliningradin dhe Bjellorusinë. Lufta e Rusisë kundër Ukrainës dëshmon se kërcënimi ushtarak është real. Qëndrimi ushtarak agresiv i Rusisë, militarizimi intensiv i rajonit të Kaliningradit përbëjnë një kërcënim vërtet serioz për Bjellorusinë, e cila është plotësisht e integruar në sistemin ushtarak të Rusisë, dhe për Lituaninë dhe gjithë rajonin. NATO duhet të jetë e gatshme të përgjigjet menjëherë në rast të një kërcënimi”, deklaroi Anusauskas.
Siç tha ai, vendi i tij mbështet fuqishëm Ukrainën për të arritur fitoren në luftën me Rusinë.
“Jashtëzakonisht është e rëndësishme që Gjermania dhe vendet e tjera që kanë tanke ‘Leopard’ të vendosin t’i dërgojnë ato në Ukrainë. Forcat e armatosura ukrainase duhet të marrin të gjithë mbështetjen e nevojshme ushtarake për të mposhtur Rusinë”, tha Anusauskas.
Burimi: AA
