Ministrja izraelite e Mbrojtjes së Mjedisit, Tamar Zandberg ka kërkuar të anulohet një marrëveshje me Emiratet e Bashkuara Arabe (EBA) për të transportuar naftë bruto të EBA-së përmes Izraelit në Evropë, duke përmendur shqetësime mjedisore dhe të sigurisë.
Gazeta izraelite “Israel Hayom” tha se një krizë diplomatike shfaqet midis Tel Avivit dhe Abu Dhabi-it pas kërkesës së ministres Zandberg, që i përket partisë së majtë Meretz, për të anuluar marrëveshjen e nënshkruar midis kompanisë shtetërore “Europe Asia Pipeline Co (EAPC)” dhe kompanisë nga emiratet “MED-RED Land Bridge Ltd” për të transportuar naftë bruto dhe lëndë djegëse nga Gjiri në tregjet perëndimore përmes një tubacioni midis qytetit Eilat në Detin e Kuq dhe portit mesdhetar Ashkelon.
Zyrtarët nga EBA thuhet se paralajmëruan për një krizë me qeverinë izraelite nëse marrëveshja anulohet, mes paralajmërimeve se veprimi mund të ndikojë në marrëveshjen e tyre të normalizimit, e cila u nënshkrua midis dy vendeve në shtator të vitit 2020.
Deri më tani, as qeveria izraelite dhe as autoritetet në EBA nuk konfirmuan raportimin e gazetës, e cila është e afërt me ish-kryeministrin Benjamin Netanyahu.
Vitin e kaluar, aktivistët izraelitë të mjedisit organizuan tubime për të protestuar kundër marrëveshjes midis dy vendeve.
Marrëveshja midis Izraelit dhe EBA-së ka ngritur shqetësime në Egjipt pasi do të ndikojë në transportimin e naftës përmes Kanalit të Suezit ku mund të preken të ardhurat e tij.
Në shtator të vitit 2020, EBA dhe Izraeli nënshkruan një marrëveshje të ndërmjetësuar nga SHBA-ja për të normalizuar marrëdhëniet mes tyre. Që nga ajo kohë, të dy vendet kanë nënshkruar dhjetëra marrëveshje dypalëshe në fusha të ndryshme, përfshirë investimet, shërbimet bankare dhe turizmin.
