Ende mbetet mister arsyeja e vrasjes së efektivit Novruz Cenaliaj, i cili dyshohet se u qëllua për vdekje ditën e djeshme (13 Maj) në fshatin Baltëz të Fierit.
Asllan alias Azgan Mërnica mësohet se ka qenë së bashku me nënën e tij në makinë kur ekzekutoi efektivin 28-vjeçar.
Pas krimit, 23-vjeçari është larguar për rreth 4 km larg vendngjarja dhe ka braktisur makinën në banesën e dajës së tij.
Ndërkohë policia ka dhënë shpërblim 30 mijë euro për çdo informacion që çon në kapjen e autorit të krimit.
Dëshmia e nënës
Në dëshminë e dhënë për hetuesit, ajo është shprehur se gjithçka ka ndodhur shumë shpejt. Ajete Mërnica ka deklaruar se i biri zbriti nga makina dhe nisi të konfliktohej me policin, Novruz Cenaliaj.
“Aty kam dëgjuar një të shtënë arme”, ka deklaruar nëna e 23-vjeçarit, e cila po udhëtonte në mjet së bashku me të birin. Më pas, ajo rrëfeu se djali i saj u rikthye sërish në makinë dhe janë larguar në drejtim të banesës së vëllai të saj.
“Djali iku me vrap pa më thënë se ku do shkonte”, përfundoi gruaja dëshminë.