Kryeministri grek, Kyriakos Mitsotakis ishte i vendosur në qëndrimin e tij ndaj Shqipërisë, duke dhënë një mesazh të qartë lidhur me çështjen “Beleri”. Pas shtrëngimit të duarve me kryeministrin Rama, Mitsotakis kërkoi që kryebashkiaku i zgjedhur për Himarë, Fredi Beleri, të kryejë betimin. Sipas tij, ky është parakusht që Greqia të pranojë procesin e negociatave të Shqipërisë drejt BE.
Kyriakos Mitsotakis, theksoi se Shqipëria ka bërë pengesa të konsiderueshme në respektimin e shtetit ligjor dhe shtoi se Beleri duhet të betohet edhe pse në paraburgim, gjë të cilën sipas tij e parashikon vetë ligji shqiptar.
“Është e rëndësishme që kryebashkiaku i Heimarrës të betohet në mënyrë që hija e rëndësishme që prek marrëdhëniet greko-shqiptare të largohet”, vijoi Mitsotakis. “Shpresoj dhe uroj që problemi të zgjidhet në frymën e një bashkëpunimi të mirë pa cënuar marrëdhëniet mes dy shteteve”, shtoi kryeministri grek duke sqaruar se këtë çështje do ta diskutoj me Edi Ramën .
Nga ana tjetër, Tirana zyrtare ka treguar vendosmëri në qëndrimin e saj duke nënvizuar në çdo rast se ligji është i barabartë për çdo kënd dhe çështja “Beleri” i përket drejtësisë. Megjithatë, “presioni” grek për pengesë të negociatave me BE vijon të jetë prezent dhe këtë të hënë në Tiranë, ku marrëdhëniet e mira fqinjësorë në Ballkan janë kryefjalë.
