Një 57-vjeçar, shofer i mjetit të transportit për vlerat monetare të një kompanie private, është arrestuar në Elbasan këtë të shtunë, 20 dhjetor, pasi ka përplasur për vdekje një këmbësor të moshuar.
Sipas njoftimit të uniformave blu, 57-vjeçari, përgjatë manovrimit të mjetit të blinduar, aksidentoi këmbësorin, 77 vjeç, e më pas është larguar nga vendi.
I moshuari humbi jetën përgjatë transportit për në Spitalin e Traumës.
“Specialistët e Qarkullimit Rrugor arrestuan në flagrancë shtetasin V. B., 57 vjeç, pasi dje, në fshatin Shushicë, gjatë manovrimit me mjet të blinduar për transportin e vlerave monetare, të një shoqërie private sigurie, ka aksidentuar shtetasin Xh. E., 77 vjeç, këmbësor, dhe është larguar nga vendi i aksidentit. Si pasojë, shtetasi Xh. E. ka humbur jetën gjatë transportimit për në Spitalin e Traumës”, njofton policia.
