Përfaqësuesja e lartë e Bashkimi Evropian për Punët e Jashtme dhe Politikën e Sigurisë, Federica Mogherini, deklaroi të hënën se pavarësisht mbështetjes për marrëveshjen bërthamore me Iranin, Brukseli nuk i injoron problemet e shkaktuara sjelljet e këtij vendi.
Në një prononcim për mediat përpara fillimit të takimit të Këshillit të Punëve të Jashtme të BE-së në kryeqytetin e Belgjikës, Federica Mogherini bëri me dije se pikat kryesore të këtij takimi do të jenë Ukraina, Jemeni dhe bashkëpunimi NATO-BE.
Shefja e diplomacisë evropiane tha më tej se mbështetja që Unioni ofron për marrëveshjen bërthamore të arritur me Iranin në vitin 2015 nuk do të thotë se BE-ja miraton aktivitetet e qeverisë së Teheranit në rajonin e saj dhe në Evropë.
“Ne absolutisht nuk i injorojmë problemet që shkaktohen nga sjelljet e Iranit. Këtë çështje ne e ngremë në rend të ditës haptazi me bashkëbiseduesit tanë iranianë”, shtoi ajo.
Mogherini theksoi gjithashtu se janë duke punuar mbi një mekanizëm tregtar të posaçëm që synon të anashkalojë sanksionet e Shteteve të bashkuara të Amerikës kundër Iranit, faza e dytë e të cilave hyri në fuqi më datë 5 nëntor, dhe se me rëndësi të veçantë në këtë kontekst janë hapat që do të bëjnë Gjermania, Franca dhe Anglia.