Kryetarja e LSI-së, Monika Kryemadhi ka reaguar pas lapsusit që bëri paraditen e sotme në tubimin e zhvilluar në Vlorë, kur ajo recitoi vargjet e njohura të Fan Nolit të poezisë ‘Anës lumenjve’, duke ia vendosur autorësinë Migjenit.

Zonja Kryemadhi ka publikuar një video ku shfaqet krah Luan Ramës dhe shprehet se nuk do të recitojë më poezi duke ia lënë atë kolegut.

Biseda:

Kryemadhi: Luan nuk merrem më me poezi se dhe sot në Vlorë që doja të recitoja Fan Nolin, e ngatërrova me Migjenin. Kështu që po t’i lë ty poezitë.

Luan Rama: Nuk është asgjë ngatërrimi, pasi dhe Noli dhe Migjeni dhe Ali Asllani dhe Ditëroi po të duash kanë qenë dhe mbeten referenca të mëdha atdhedashurie. Nëse Noli thotë; Ngrehuni dhe bjeruni, korrini dhe shtypini Migjeni thotë; Oh si nuk kam një grusht të fuqishëm, Malit që z’ban zan mu në zemër me ja ngjesh dhe unë të kënaqem t’uj qesh (E përsërit në të njëjtën kohë me Kryemadhin). Ose; Thuaja rini, kangës më të bukur që di”, thotë Luan Rama.

Kryemadhi: Ndaj duhet Luani!

Luan Rama: Nga Vlora, edhe një herë po e them se këtu merr vlerë jo vetëm Noli, jo vetëm Migjeni, por fjala e çdo shqiptari.

Në takimin e sotëm të mbajtur në Vlorë, zonja Kryemadhi u tha qytetarëve “Ngrehuni dhe bjeruni, korrini dhe shtypini, të gjithë ata që grabisin shqiptarët”, me pjesën e parë të fjalëve të marra nga poezia “Anës Lumenjve”. Por në vend që të thoshte se ato janë të Fan Nolit, Kryemadhi tha se janë të Migjenit.