Kreu i PD-së, Lulzim Basha iu është përgjigjur akuzave të Gazment Bardhit se ka marrë dy kate në kullën më të shtrenjtë të Tiranës.
Basha e cilësoi si “shpifje e pastër e shkollës berishiste”, ndërsa theksoi se “familjarët e mi çdo transaksion e kanë të deklaruar, paguajnë cent me cent taksat”.
“Është një shpifje e pastër e shkollës berishiste, vjen nga një njeri që deri dje sulmonte babin e Xenit dhe sot është bërë avokati i babait të Xenit dhe kullave 64 katëshe. Familjarët e mi çdo transaksion e kanë të deklaruar, paguajnë cent me cent taksat, e kanë transparent ndryshe nga aleanca e kullave dhe avokati i tyre më i ri Gaz Bardhi”, u shpreh ai jashtë Parlametit.
Kreu i grupit të PD-së hodhi akuzat ndaj Bashës gjatë fjalës në foltoren e Kuvendit ku u shpreh se ai është i vetmi që ka marrë nja dy kate në një kullë nga zonat më të shtrenjta të Tiranës.
“U emocionova shumë veçanërisht nga kjo aleanca e kullave. Është i vetmi që ka marrë nja dy kate në një kullë nga zonat më të shtrenjta të Tiranës. Kur vjen këtu i nderuar koleg për të akuzuar kolegët për aleanca kullash numëro njëherë katet e kullave të tua, në kullën më të shtrenjtë të Tiranës, tënde dhe të familjarëve të tu”, tha Bardhi.