Muzeu Ikonografik “Onufri” dhe Muzeu Etnografik, Berat mbeten atraksionet turistike të preferuara nga turistët e huaj dhe vendas përgjatë tre muajve të parë të vitit 2019.
Numri i vizitorëve në këto muze për periudhën janar-mars 2019, ka shënuar një rritje të dukshme, gati 68% më shumë se e njëjta periudhë e viti 2018. Gjatë muajve janar- mars të 2018 muzetë e Beratit kanë mirëpritur 2545 vizitorë ndërsa përgjatë këtyre muajve gjatë 2019 ky numër ka shkuar në 4296 vizitorë pra 169% më shumë vizitorë se në 2018.
Të ardhurat nga biletat për peiudhën janar – mars 2019, kanë shënuar një rritje me gati 73% më shumë se e njëjta periudhë e 2018.
Muzeu Etnografik është krijuar në vitin 1979 në një banesë me arkitekturë karakteristike beratase. Periudha e ndërtimit i përket shekullit të XVIII.
Mjedisi i jashtëm i këtij muzeu shquhet për një kombinim të natyrshëm të objekteve te mëdha muzeale. Pranë pusit është vendosur mëngra (mulliri shtypës), si dhe presa e drunjtë që shërbente për nxjerrjen e vajit nga ulliri.
Gjithashtu këtu ka edhe shumë enë të mëdha qeramike që përdoreshin kryesisht për mbajtjen e produkteve të lëngshme. Ky muze ka një fond të pasur me rreth 1200 objekte.
Muzeu mban emrin “Onufri”, njëri prej kryemjeshtrave të pikturës shqiptare të shek. XVI. Kisha është rindërtuar në vitin 1797 në lagjen “Kala”, ka qenë katedralja e qytetit e cila është monumenti më përfaqësues i arkitekturës pas bizantine në qytetin e Beratit.
Koleksioni i muzeut përbëhet nga 173 objekte të përzgjedhura nga një fond prej më se 1500 objektesh që i takojnë fondeve të kishave dhe manastireve të Shqipërisë.