Rrugëtimi i krijuesve të rinj në teatër u kurorëzua mbrëmjen e të martës me katër çmimet kryesore aktori, aktorja, regjia dhe shfaqja më e mirë.
Juria në këtë edicion të parë vlerësoi Urim Aliajn si aktorin më të mirë, ndërsa Algiona Aga rrëmbeu mes shumë artisteve çmimin e aktores më të mirë.
Nga 14 shfaqje që u interpretuan përpara publikut kryeqytetas, edhe në qytete të tjera të vendit, shfaqja më e mirë u zgjodh “Kjo Rinia Jonë”. Vepra me një mesazh të fortë që prek përplasjet e adoleshencës me pjekurinë dhe zbërthen përballjen me të kaluarën, mori jo vetëm duartrokitjet e sallës, por edhe votat e jurisë.
SILVIO GOSKOVA
REGJISOR I VEPRES “KJO RINIA JONË”
“Që në fillim këtë nismë e kam marrë më shumë si një mundësi për të dhënë një mesazh më shumë sesa të bësh disa shfaqe të bukura dhe mendoj se e bëmë. Dua të them që bravo na qoftë që e çuam deri në fund.”
Më kërkesën që në edicionet e ardhshme të këtij festivali regjisorët të venë në skenë vepra, të cilat kanë në qendër figurën e vajzës, çmimin si regjia më e mirë e mori Ina Morinaj.
Ky sezon artistik i teatrit eksperimental “Kujtim Spahivogli” iu dedikua artistëve të rinj që kanë hedhur një hap të rëndësishëm drejt së ardhmes së tyre në skenën teatrore.
