Të tjera detaje janë mësuar nga ngjarja e rëndë në Shkodër, ku u plagosën dy të rinjtë, studenti i Akademisë së Sigurisë Gjergj Ndërshtiqa dhe kunati i tij, Gjon Nika.
Për fat të mirë të plagosurit janë jashtë rrezikut për jetën, ndërsa mësohet se kanë nga dy plumba secili në trup.
Në momentin kur autorët kanë nisur që të qëllojnë, dy të rinjtë kanë dalë menjëherë nga automjeti dhe kanë nisur të vrapojnë në tokat afër vendit të ngjarjes duke arritur që të shpëtojnë.
LEXO EDHE: VIDEO/ Plagosja e dy të rinjve, Muhamet Rrumbullaku mbërrin në Shkodër, takim me drejtorin e DVP-së dhe prokurorin e kryeqendrës së veriut
Del fotoja, ky është studenti i Akademisë së Sigurisë që plagos me armë zjarri në Shkodër së bashku me kunatin e tij
Njoftimi i policisë:
Rreth orës 19:30, në afërsi të një lokali në fshatin Grudë e Re, është qëlluar me armë zjarri shtetasi Gj. N., rreth 30 vjeç. Si pasojë e të shtënave është plagosur edhe kunati i tij, shtetasi Gj. N., 28 vjeç, student në Akademinë e Sigurisë. Të dy këta shtetas janë transportuar në spital, për ndihmë mjekësore.
Në drejtim të vendit të ngjarjes janë nisur shërbimet e Policisë, drejtuesit e Drejtorisë Vendore të Policisë dhe të Komisariatit të Policisë Shkodër.
Në ndihmë të Policisë vendore janë nisur disa grupe të Forcës Kombëtare të Sigurisë dhe të RENEA-s, si dhe specialistë nga Departamenti i Policisë Kriminale në Policinë e Shtetit.
Shërbimet e Policisë, gjatë kontrollit të zonës, për kapjen e autorëve, në afërsi të vendit të ngjarjes, kanë konstatuar duke u djegur një automjet tip “Renault”, i cili dyshohet se është përdorur nga autorët.
Grupi hetimor, në drejtimin e Prokurorisë, po punon për zbardhjen e plotë të rrethanave të ngjarjes dhe identifikimin e autorit.
Pas sqarimit të rrethanave të ngjarjes dhe në përfundim të veprimeve të para, do të ketë informacion më të detajuar për këtë rast.
