Gjykata Themelore në Prishtinë dënoi me katër vjet e tetë muaj burg ish-shefin e Agjencisë Kosovare të Inteligjencës, Driton Gashi, për deportimin e paligjshëm të gjashtë shtetasve turq që kishin leje qëndrimi dhe pune në Kosovë.
Sipas aktakuzës, të ngritur nga Prokuroria Speciale e Kosovës, Gashi ka keqpërdorur detyrën e tij zyrtare duke rekomanduar heqjen e lejes së qëndrimit dhe mosdhënien e lejes për një shtetas turk sepse “paraqesin rrezik për sigurinë kombëtare.”
Valon Ramadani, ish-drejtori i Departamentit për Shtetësi, Azil dhe Migrim në Ministrinë e Punëve të Brendshme të Kosovës dhe Rahman Sulejmani, ish-drejtor i Drejtorisë për Migrim dhe të Huaj në Policinë Kufitare, janë liruar nga akuzat.
Në shkurt të vitit 2021, Prokuroria Speciale e Kosovës ngriti aktakuzë kundër këtyre tre ish-zyrtarëve pasi gjashtë shtetas turq u arrestuan në një operacion të madh nga Policia e Kosovës dhe Agjencia Kosovare e Inteligjencës.
Organizata ndërkombëtare për të drejtat e njeriut Human Rights Watch ka kritikuar autoritetet e Kosovës lidhur me këto arrestime.
Fjala është për gjashtë eksponentë të FETO-s, organizatës të cilën Ankaraja e akuzon për grushtin e shtetit në korrikut 2016.
