Kryeministri Edi Rama paralajmëroi se do të ndëshkohen të gjithë ata që kthehen nga zonat e prekura me koronavirus dhe nuk vetëkarantinohen. Rama tha në mbledhjen e qeverisë se këto masa duhet të merren për të ndaluar përhapjen e koronavirusit.
“Duhet vetëkanrantimimi i personave që vijnë nga zonat e kuqe, Vetëkarantimi gjendet edhe në ligjin tonë aktual të Republikës së Shqipërisë. Shoqërohet me masë administrative për thyerjen e këtij rregulli. Çdo individ duhet të kuptojë se ka një rol në këtë përballje. Për të ruajtur veten dhe të tjerët duhet të vetëkarantinohet nëse vjen nga një zonë e kuqe. Pas rasteve të konfirmuara mjediset e përgatitur më parë për karantinë janë në dispozicion. Dhomat e izolimit janë funksionale dhe është punuar për stokun e materialeve.”
Shkollat, fluturimet me Italinë e Veriut, aktivitetet kultuore, sportive, tubimet janë të pezulluara deri më 3 mars. Masat u morën pas konfirmimit të dy rasteve të para me koronavirus në Shqipëri.