Kryetari i grupit parlamentar të Partisë Socialiste, Taulant Balla ka folur për incidentin në Elbasan, ku tha se ishte diçka e inskenuar nga Partia Demokratike.
I ftuar në emisionin “Koha për tu zgjuar” në News24, Balla tha se fushata do të jetë e qetë, ndërsa një apel kishte edhe për të gjitha partitë politike.
“Fushata është e qetë. Ajo që ndodhi në Elbasan nuk ka lidhje me fushatën. Jemi duke dalë para të ndershmëve, që është populli.
Ajo që ndodhi në Elbasan ishte një akt i shkaktuar nga PD, për të prishur festa. Në dasmë nuk shkohet ne flamuj partie.
Festa e Ditës së Verës është festë që shkohet për të respektuar këtë festë. Është moment i tejkaluar. Mendoj se do të jetë një fushatë e qetë.
Apeli im ndaj PD dhe partive të tjera është që të respektojmë vullnetin e shqiptarëve, të qytetarëve”, tha Balla.
Balla u shpreh se dënon incidentin në Elbasan dhe se situata të tilla i prishin imazhin qytetit.
“Patjetër, çdo akt i tillë duhet dënuar. Ishte moment i inskenuar, i rregulluar kokë e këmbë nga PD.
Në çdo moment krijon situata që si bën nder Elbasanit. Elbasani është qytet që bashkëjetesa dhe solidaritet është simbol. Sa herë del një demokrat thotë; ‘Elbasani është qyteti i krimit’.
Jo mor vëlla, Elbasani është qyteti i dijes. Furnizuese i dijes ka qenë Elbasani. Ju lutem shumë, kur të flitet për Elbasanin, të flasim për gjërat e mira të këtij qyteti.
Besoj se këto 4 javë të shkojnë normalisht. Njerëzit duhet të përcaktojnë se cilën parti do të votojnë”, tha Balla ndër të tjera.
