Në kuadër të projektit “Frymëmarrje për të ardhmen”, ndërmarrë nën kujdesin e Presidentit të Turqisë, Recep Tayyip Erdogan, në Tiranë është organizuar aktiviteti i dhurimit nga Turqia të 1 mijë fidanëve frutorë, ku një pjesë e tyre janë mbjellë edhe gjatë ceremonisë, të cilën e përshëndeti me videokonferencë Presidenti turk.
Në ceremoninë e organizuar në Liqenin e Farkës në Qarkun e Tiranës ishin të pranishëm Kryeministri i Shqipërisë, Edi Rama, ambasadori i Turqisë në Tiranë, Murat Ahmet Yörük, ministri i Bujqësisë dhe Zhvillimit Rural i Shqipërisë, Bledi Çuçi, kryetari i Bashkisë së Tiranës, Erion Veliaj, koordinatorja e Agjencisë Turke për Bashkëpunim dhe Koordinim (TIKA) në Tiranë, Dr. Emine Gizem Başkan dhe zyrtarë të tjerë.
Presidenti turk në lidhjen e drejtpërdrejtë në ceremoninë e dhurimit është shprehur se pemët sot në Shqipëri mbillen si shenjë e miqësisë midis Turqisë dhe Shqipërisë.
“Përshëndes mikun tim Edi Rama. Shpresojmë që këto pemë që mbillen sot në Shqipëri si shenjë e miqësisë sonë të qëndrojnë dhjetëra, qindra vite”, tha Presidenti Erdogan.
Kryeministri Rama në fjalën e tij në aktivitet tha se ky është edicioni i dytë i një festivali ndërkombëtar, organizuar nën kujdesin e Presidentit Erdogan.
“Në edicionin e parë në shumë vende të botës në të njëjtën orë janë mbjellë 11 milionë pemë, çka siç kam mësuar ka hyrë dhe në librin Guinness të rekordeve. Sot në Tiranë jemi së bashku në të njëjtën orë me një numër të konsiderueshëm vendesh të tjera për të mbjellë këtu në Liqenin e Farkës 1.000 pemë në një proces ku Tirana ka qenë në vijën e parë me një ndërprerje të vogël ndërmjet dy fazave, gjatë kohës që unë isha kryetar bashkie dhe që kur Erioni ka marrë bashkinë në funksion të shumicës”, theksoi Rama.
Më tej, Kryeministri Rama theksoi se në muajin dhjetor Ministria e Bujqësisë dhe Zhvillimit Rural së bashku me Ministrinë homologe në Republikën e Turqisë do të ulen së bashku për të diskutuar një plan të përbashkët, ku ndër dimensionet e tjera, siç tha ai, është edhe “dimensioni i gjelbër lidhur me pyjet, për të cilat Turqia është një nga shembujt më domethënës sot në botë dhe ka një ekspertizë të jashtëzakonshme që bujarisht do të na e përcjellë edhe neve”.
“Edhe një herë shumë faleminderit për këtë nismë dhe për praninë e ambasadorit, një mik i mirë i Shqipërisë, i shqiptarëve, siç është patjetër edhe i tillë Presidenti Erdogan”, u shpreh Rama.
Ambasadori Yörük, nga ana e tij, tha se i është kushtuar një vëmendje e veçantë programit “Frymëmarrje për të ardhmen”.
“Mund të themi që ky projekt është filluar nëpërmjet iniciativës kryesore të Presidentit të Republikës së Turqisë, Erdogan, vitin e kaluar dhe tashmë ashtu siç jemi mbledhur edhe sot në këtë ceremoni e cila do të përhapët dalëngadalë në të gjitha vendet e rajonit. Aktualisht është një projekt që po zbatohet tashmë në 30 shtete të botës. Besoj që shumë shpejt do të arrijë në shifër akoma më të lartë. Dua të ndaj ndjenjat e mia të përzemërta këtu dhe njëkohësisht dua të falënderoj qeverinë shqiptare që na qëndroi pranë si një mbështetje ndaj këtij projekti”, u shpreh ambasadori turk në Tiranë.
Kryebashkiaku Veliaj në lidhje me projektin tha se kjo është një iniciativë e nisur në Turqi nga Presidenti Erdogan dhe një festival i cili quhet frymëmarrje drejt të ardhmes.
“Besoj se një nga gjërat që na bëri shumë të ndjeshëm gjatë eksperiencës me COVID ishte fakti i një paqeje që duhet të arrijmë me natyrën”, shtoi Veliaj.
Ministër i Bujqësisë dhe Zhvillimit Rural, Bledi Çuçi, duke iu drejtuar Presidentit Erdogan tha: “I nderuar President, më lejoni të përcjellë përshëndetjet më të përzemërta të Kryeministrit Rama i cili ishte me ne sot për më shumë se një orë këtu në Farkë. Ne po mbjellim rreth 1.000 fidanë në kuadër të këtij festivali madhështor të pyllëzimit jo vetëm të rajonit, por do të thoja një iniciativë për gjithë botën. Si ministër jam shumë i lumtur që jam pjesë e kësaj iniciative. Faleminderit dhe ju përshëndesim nga Tirana.”
Fidanët frutorë janë mbjellë në Njësinë Administrative Farkë në Qarkun e Tiranës me mbështetjen e TIKA-s.
Në kuadër të projektit “Frymë për të Ardhmen 2020” me rastin e 11 nëntorit, Ditës Kombëtare të Pyllëzimit në Turqi, që organizohet për herë të dytë këtë vit, në Komunën e Zhelinës të Maqedonisë së Veriut janë mbjellë 250 fidanë.
Në projektin, i cili këtë vit zbatohet nga Turqia me synimin për të rritur ndërgjegjësimin në lidhje me pemët, në Maqedoninë e Veriut u organizua me mbështetjen e Ambasadës së Turqisë në Shkup, Agjencisë Turke për Bashkëpunim dhe Koordinim dhe Ministrisë së Bujqësisë, Pylltarisë dhe Ekonomisë së Ujërave.
Në aktivitetin ku fidanët u mbollën në Komunën e Zhelinës, morën pjesë ministri i Bujqësisë, Pylltarisë dhe Ekonomisë së Ujërave, Arijanit Hoxha, ambasadori i Turqisë në Shkup, Hasan Mehmet Sekizkök, koordinatori i TIKA-s në Shkup, Halim Ömer Söğüt dhe nxënësit e Shkollës së Fondacionit Turk Maarif në vend.
Ambasadori Sekizkök rikujtoi se vitin e kaluar në Turqi kanë mbjellë 13.5 milionë fidanë.
“Besoj se me fidanët që i mbollëm afër Urës së Gurit nga periudha osmane që lidhë të dyja anët e Vardarit jemi duke dhënë një frymë të re për ajrin që e thithim”, tha ai.
Hoxha nga ana e tij tha se kjo ditë përveç në Maqedoninë e Veriut shënohet edhe në disa vende të Ballkanit, Azisë dhe Afrikës.
Maqedonia e Veriut dhe Turqia, sipas tij, kanë një bashkëpunim të shkëlqyeshëm shumëvjeçar në të gjitha fushat përfshirë edhe në fushën e pylltarisë. “Sot këtu në Komunën e Zhelinës pranë urës historike që është ndërtuar në kohën Osmane në lumin Vardar e cila daton nga shekulli i 16-të së bashku mbollëm fidanë me të cilat edhe një herë promovojmë miqësinë mes dy vendeve tona dhe do të japim një kontribut që mund të duket i vogël por sado kudo përmirëson ambientin jetësor”, u shpreh ai.
Ndërsa kryetari i Komunës së Zhelinës, Blerim Sejdiu falënderoi të gjithë ata që kanë kontribuar në këtë aktivitetet shumë të vlefshëm.
Në program mori pjesë nëpërmjet videokonferencës edhe Presidenti i Turqisë, Recep Tayyip Erdogan.
Turqia vitin e kaluar 11 nëntorin e shpalli Ditë Kombëtare të Pyllëzimit ndërsa këtë vit do të realizojë mbjellje të fidanëve në 35 vende të botës. (AA)
