Për të 10-tin vit me radhë, kreu i qeverisë Edi Rama së bashku me familjarët e 4 viktimave të 21 Janarit, janë duke kryer homazhe në vendin ku u vranë 4 protestuesit.
Nën reshjet e shiut që bjenë litar, Rama dhe familjarët kanë vendosur lule, dhe kanë përshkruar në këmbë Bulevardin, për tu kthyer sërish në kryeministri.
Sot bëhen 11 vite nga protesta e 2011-tës, dhe për 10 vitet që pasuan qeveria dhe deputetët kanë mbajtur homazhe në Bulevard, edhe pse drejtësia nuk ka folur ende.
Qeveria socialiste është akuzuar vazhdimisht për moszbardhjen e vrasjeve të 21 Janarit, dhe për përdorimin politik të viktimave.
Vetë Rama në një postim në rrjetet sociale tha mëngjesin e sotëm se drejtësia vonon por nuk harron, dhe sipas tij një ditë ajo do të vendoset në vend.
Protesta e 21 janarit 2011 u mbyll me katër viktima, tre të vrarë me armë zjarri në harkun e dhjetë minutave dhe një i plagosur rëndë që do të ndërronte jetë pak ditë më vonë.
Sot mbushen 11 vjet nga vrasja e 4 protestuesve të cilët atë kohë protestonin para Kryeministrisë, më 21 Janar të 2011-ës kur Partia Socialiste ishte në opozitë ndërsa PD-ja dhe LSI-ja qeverisnin së bashku dhe kryeministër atëherë ishte Sali Berisha, ndërkohë Lulzim Basha ishte ministër i Brendshëm.
Ziver Veizi, Aleks Nika, Hekuran Deda dhe Faik Myrtaj janë viktimat e 21 janarit.
Familjarët e tyre akoma sot presin drejtësi. Vitin e kaluar Policia e Tiranës përmes një kërkese i është drejtuar Prokurorisë së Tiranës për rihapjen e dosjes “21 Janari”. Kujtojmë se Prokuroria e Tiranës i pezulloi hetimet për njërin prej të vrarëve në bulevard, Aleks Nikën, në 2020.
…
/faxweb
