Nikoll Lesi shprehet entuziast, se më 25 prill, opozita në Shqipëri, do bëjë të njëjtën gjë që bëri ajo në Kosovë.

“Në Kosovë u zhvilluan zgjedhjet e parakohshme parlamentare. Fitoi bindshëm Albin Kurti, bashkë me Vjosa Osmanin.

Shtypi botëror i quajti jo zgjedhje, por përmbysje e madhe apo me saktë Referendum Popullor. Albin Kurti mori 48 për qind të votave, bile kur të numërohen edhe votat e diasporës ai mund ta kalojë i vetem 50-përqindshin.

Qeverinë Kurti e përmbysen pabesisht dhe tinëzisht. Një dorë në rrëzimin e tij ia dha edhe kryeministri Rama. Bashkë me Hashim Thaçin. Ky i fundit ndodhet në burgun e Hagës. Ndërsa Rama akoma në qeveri deri më 25 prill.

Por pasi e rrëzuan Kurtin, Kryeministri shqiptar e ironizoi e talli, bile e përçmoi për kauzën e tij patriotike.

Po kështu u tall edhe me Vjosa Osmanin, presidente në detyrë në Kosovë.

Ajo që bie në sy, edhe pas këtyre prapësive ndaj të dyve, deri më sot kryeministri shqiptar, as në cilësinë e kryetarit të PS nuk i ka uruar për fitoren këtë dyshe në Kosovë. E uruan Lulzim Basha dhe Monika Kryemadhi.

Por jo Rama!

Minimalisht, një formalitet duhej ta bënte Edi Rama.

Edhe nëse nuk i shikon dot me sy, prapë duhet ti urojë për fitoren si referendum që u zhvillua në Kosovë.

Me sa duket frika e shembullit kosovar që do të përsëritet edhe në Shqiperi më 25 prill, e frikëson Ramën.

Data 25 prill edhe pak javë ka e do të jetë në Shqipëri më e fuqishme se në Kosovë.

Një gjë e sigurtë është tashmë e padiskutueshme: Më 25 prill Shqipëria do të marrë shembullin e Kosovës, bile shumë më shumë se kaq!

Albin Kurti dhe Vjosa Osmani janë shembull frymëzues për botën shqiptare”, shkruan ai.