Ish kryeministri i Kosovës Hashim Thaçi dhe tre bashkëpunëtorët e tij në kohën e luftës Kadri Veseli, Jakup Krasniqi dhe Rexhep Selimi kanë dalë para Gjykatës Speciale në Hagë, pasi akuzohen për krime lufte dhe krime kundër njerëzimit.
Thaçi ka pohuar sërish se është i pafajshëm dhe nuk ka lidhje me akuzat që i janë ngritur.
“E kuptoj aktakuzën, jam plotësisht i pafajshëm”, tha Thaçi.
Në Dhomat e Specializuara ka nisur seanca e parë gjyqësore. Prokurori i Specializuar do të ketë maksimum pesë orë kohë për të mbrojtur rastin
Prej nëntorit të vitit 2020, ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi, gjenden në paraburgim në Hagë të Holandës.
Dhomat e Specializuara dhe Zyra e Prokurorit të Specializuar të Kosovës, me seli në Hagë, janë krijuar pas votimit më 2015 nga deputetët e Kuvendit të Kosovës.
Ky institucion, që njihet edhe si Gjykata Speciale, heton krimet e pretenduara të pjesëtarëve të UÇK-së, të kryera ndaj pakicave etnike dhe rivalëve politikë nga janari i vitit 1998 deri në dhjetor të vitit 2000.
Në aktakuzën e Prokurorit të Specializuar ndaj ish-krerëve të UÇK-së, përmenden 40 lokacione ku dyshohet se u kryen krime.
Po ashtu, aty përmenden më shumë se 400 persona që dyshohet se janë ndaluar jashtëligjshëm, 102 të vrarë dhe 20 të zhdukur.