Imuniteti kolektiv nuk do të arrihet këtë vit, megjithëse shpërndarja e vaksinave ka filluar në shumë vende, paralajmëroi Organizata Botërore e Shëndetësisë (OBSH).

“Në 2021, ne nuk do të arrijmë imunitet kolektiv,” tha shefi shkencëtarja e OBSH-së Soumya Swaminathan në një konferencë shtypi në Gjenevë, duke theksuar rëndësinë e vazhdimit të zbatimit të masave mbrojtëse, të tilla si mbajtja e distancës fizike, larja e duarve dhe mbajtja e maskës, në trajtimin e pandemisë.

Ajo vlerësoi “përparimin e pabesueshëm” që kanë bërë shkencëtarët kur kanë zhvilluar disa vaksina të sigurta dhe efektive kundër COVID në më pak se një vit.

Vaksina, në të gjitha vendet

Por prodhimi i tyre “do të marrë kohë”.

“Do të duhet kohë për të prodhuar doza në masë, jo vetëm miliona, por miliarda,” shtoi ajo, duke bërë thirrje për “durim”.

Swaminathan pohoi se përfundimisht “vaksina do të shkojë në të gjitha vendet”. “Por ndërsa presim, le të mos harrojmë për masat mbrojtëse që janë efektive,” kujtoi ajo.

Sipas mendimit të saj, është e nevojshme të vazhdojmë të zbatojmë masa epidemiologjike dhe sociale në mënyrë që të kufizojmë transmetimin e virusit “të paktën deri në fund të këtij viti”.