Hakeem Jeffries u zgjodh të mërkurën si lider i Partisë Demokratike në Dhomën e Përfaqësuesve të SHBA-së, duke u bërë afrikano-amerikani i parë që mban një pozicion kaq të lartë në Kongres.
52-vjeçari Jeffries nga New York-u do të marrë postin më 3 janar kur të fillojë seanca e 118-të e Kongresit, transmeton Hina.
Vendimi i demokratëve shënon gjithashtu ngritjen e një brezi të ri liderësh në Dhomën e Përfaqësuesve me 435 anëtarë dhe fundin e epokës së Nancy Pelosit, 82 vjeçe, e cila në vitin 2007 u bë gruaja e parë që drejtoi Dhomën e Përfaqësuesve.
“Rritja e Hakeem Jeffries në pozicionin më të lartë të demokratëve në Dhomën e Përfaqësuesve është një pikë kthese në historinë e Shteteve të Bashkuara të Amerikës,” tha Chuck Schumer, udhëheqësi i shumicës demokrate në Senat, pak para u shpallën rezultatet. Të dy janë nga Bruklini.
Gjatë shpalljes zyrtare të kandidaturës së tij më 18 nëntor, pas dhjetë vitesh në Dhomën e Përfaqësuesve, Jeffries premtoi se përfaqësuesve më të rinj do t’u jepej më shumë hapësirë në formësimin e ligjit.
“Mundësitë për politikëbërje kuptimplotë dhe angazhim publik duhet të shpërndahen në mënyrë të drejtë pavarësisht viteve të shërbimit,” shkroi Jeffries në një letër drejtuar kolegëve demokratë.
“Brezat e rinj”
Pas zgjedhjeve afatmesme, demokratët humbën kontrollin e Dhomës së Përfaqësuesve, por republikanët do të kenë një shumicë të vogël.
Republikanët dhe lideri i tyre Kevin Mçarthy, i cili dëshiron të bëhet kryetar i Dhomës së Përfaqësuesve, kanë paralajmëruar demokratët se do të nisin hetime kundër zyrtarëve të administratës Biden, madje edhe kundër presidentit dhe djalit të tij, Hunter Biden.
Ata thonë gjithashtu se duan shkurtime të thella të shpenzimeve pas viteve në të cilat të dyja palët i kanë kushtuar pak ose aspak vëmendje deficiteve buxhetore në rritje dhe borxhit kombëtar që tani arrin në 31.3 trilion dollarë.
