Ministri i Punëve të Jashtme të Emirateve të Bashkuara Arabe, Anwar Gargash, u bëri thirrje muslimanëve që të pranojnë pikëpamjet e presidentit francez Emmanuel Macron mbi domosdoshmërinë e supozuar të integrimit të tyre.
“Muslimanët duhet të dëgjojnë me kujdes atë që tha Macron në fjalimin e tij. Ai nuk dëshiron izolimin e muslimanëve në Perëndim”, tha Gargash për gazetën gjermane Die Welt.
Ai gjithashtu tha që muslimanët duhet të integrohen më mirë në shoqërinë perëndimore dhe se shteti francez ka të drejtë të kërkojë mënyra për ta bërë këtë, ndërsa në të njëjtën kohë udhëheq luftën kundër ekstremizmit.
Franca ka qenë një skenë e shpeshtë e aktiviteteve anti-islame për disa vjet, ndërkohë që Macron provokoi kritika dhe reagime veçanërisht të mprehta nga bota islame me fjalimin e tij mbi krizën e pretenduar të Islamit dhe nevojën për të ristrukturuar këtë fe. Më 2 tetor, ai akuzoi muslimanët në Francë për kultivimin e disa ideve, sipas tij, separatiste.
Inkurajimi i botimit të karikaturave
Më 13 tetor, ministri i Brendshëm francez Gerald Darmanin tha se 73 xhami, shkolla private dhe objekte biznesi ishin mbyllur në vend që nga fillimi i vitit si pjesë e luftës kundër islamizmit radikal. Ai gjithashtu tha se shqetësohet nga raftet speciale në tregjet që shesin produkte hallall.
Nën maskën e avokimit për lirinë e fjalës, zyrtarët francezë vazhduan të inkurajojnë botimin e karikaturave të diskutueshme të revistës Charlie Hebdo. Presidenti francez Macron tha se botimi i karikaturave të tilla nuk do të parandalohej, dhe menjëherë më pas u shfaqën mbishkrime dhe karikatura fyese në disa ndërtesa publike.
Vende të shumta muslimane, përfshirë Turqinë, kanë dënuar njëzëri sulmet ndaj Islamit dhe muslimanëve në Francë, duke nxitur dhe fushatat kundër produkteve franceze në mediat sociale. Në disa vende të botës islame, produktet franceze janë hequr nga raftet në tregje.
